Növbədənkənar Azərbaycan Respublikası Prezidenti seçkiləri Xocalı rayonu ərazisində iki məntəqədə keçirilir. 124 saylı Şuşa-Ağdam-Xocalı-Xocavənd seçki dairəsinin 106 saylı məntəqəsi Xocalı rayonu Təzəbinə kəndində, 107 saylı məntəqəsi isə Əsgəran qəsəbəsində yaradılıb.
107 saylı seçki məntəqəsində səsvermənin gedişini müşahidə edilib.
Məntəqə seçki komissiyasının sədri Əliniyaz Nəcəfov bildirib ki, məntəqədə seçkilərin şəffaf və demokratik keçirilməsi üçün hər cür şərait yaradılıb. Seçicilər səhər saatlarından başlayaraq məntəqəyə gəlir, sərbəst və azad şəkildə öz vətəndaşlıq borclarını yerinə yetirirlər.
Səsvermədə iştirak edən seçicilər məntəqədə yaradılan şəraitdən razılıq edib, işğaldan azad edilmiş ərazidə səs verdikləri üçün qürur hissi keçirdiklərini dilə gətiriblər.
Seçici Elmir İsmayılov deyib: “44 günlük Vətən müharibəsində qazanılan şanlı Zəfər hər bir azərbaycanlıda böyük qürur hissi yaratmışdı. Bu gün növbədənkənar prezident seçkilərinin işğaldan azad edilmiş ərazilərdə keçirilməsi hər birimizi bir daha qürurlandırdı. Mən də bir Azərbaycan vətəndaşı olaraq Əsgəran qəsəbəsində yaradılmış seçki məntəqəsinə gələrək səsvermədə iştirak etdim. Azad edilmiş ərazidə səs vermək qürurvericidir. Allah dövlətimizi hər zaman qüdrətli, xalqımızı qürurlu etsin”.