Bakı, 16 sentyabr.

Beynəlxalq İnvaziv Kardiologiya Günü sentyabrın 16-da qeyd olunur və milyonlarla insanın həyatını xilas etməyə kömək edən tibbin nailiyyətlərinə diqqəti cəlb etmək məqsədi daşıyır.

İnvaziv kardiologiya angioplastika və stentləşdirmədən tutmuş ürəyin aorta qapağının transkateter implantasiyasınadək genişspektrli üsulları əhatə edir. Həmin əməliyyatlar ürək-damar xəstəliklərinin müalicəsində əsl sıçrayış olub, mürəkkəb açıq əməliyyatlara ehtiyac olmadan müalicə aparmağa və pasiyentlərin sağalma prosesini sürətləndirməyə imkan verir.

Bayramın tarixi təsadüfi seçilməyib – 1977-ci il sentyabrın 16-da alman həkim Andreas Qrünsiq dünyada ilk uğurlu koronar angioplastika əməliyyatını həyata keçirib. Bu innovativ yanaşma ürəyin işemik xəstəliyinin müalicəsində yeni eranın başlanğıcı olub. 2022-ci il sentyabrın 2-də həmin əlamətdar gün Birləşmiş Millətlər Təşkilatının Baş Assambleyasının A/RES/76/302 saylı qətnaməsi ilə az invaziv texnologiyaların inkişafının əhəmiyyətini xatırladan gün kimi rəsmən təsbit edilib.

Ümumdünya Səhiyyə Təşkilatının məlumatına görə, ürək-damar xəstəlikləri bütün dünyada ölümün əsas səbəbidir. İnvaziv kardiologiya üsullarının meydana gəlməsi ilə həkimlər infarkt və digər ürək-damar hadisələri nəticəsində ölüm hallarını əhəmiyyətli dərəcədə azaltmaq imkanı əldə ediblər. Müdaxilələrin minimal travmatik olması pasiyentlərin gündəlik həyatlarına daha tez qayıtmasına imkan verir və bu üsulları xüsusilə aktual edir.

Lakin bu müasir imkanların reallaşdırılması qarşısında ciddi maneələr mövcuddur. Dünyanın bir çox ölkəsində bu müalicə üsullarına çıxış məhduddur, çünki yüksək texnologiyalı avadanlıqlar və mütəxəssislərin hazırlanması böyük maliyyə vəsaiti tələb edir. Halbuki vaxtında müdaxilə çox vaxt insan həyatının xilas edilməsində həlledici amilə çevrilir. Buna görə də bu günlə bağlı tədbirlər yalnız həkimlərin peşə bayramı deyil, həm də cəmiyyət üçün mühüm maarifləndirmə kampaniyasıdır.

Beynəlxalq İnvaziv Kardiologiya Günü birgə səylərə çağırır – dövlətlər invaziv kardiologiyanın inkişafına yönəlmiş proqramları hərtərəfli dəstəkləməli, tibb müəssisələri isə mütəxəssislərin təliminə və texnologiyaların tətbiqinə investisiya yatırmalıdırlar. İnvestisiyalarla yanaşı, həmin sahədə uğurun təmin edilməsi üçün tibb mərkəzləri arasında daim təcrübə mübadiləsi aparılması, eləcə də cəmiyyətin ürək-damar xəstəlikləri, onların profilaktikası və müalicəsi barədə məlumatlılığının artırılması zəruridir.

Bu baxımdan, bugünkü tarix səhiyyənin gələcəyi haqqında düşünmək üçün də bir fürsətdir. Bu gün bizə xatırladır ki, ürək-damar xəstəlikləri ilə mübarizə davamlı tərəqqi, tibbi yardıma bərabər çıxış və cəmiyyətin bu unikal tibb sahəsinin inkişafını dəstəkləməyə hazır olmasını tələb edir. Məhz belə yanaşma milyonlarla insanın sağlamlığını qorumağa və onların uzun, fəal həyat sürmək şanslarını artırmağa imkan verə bilər.