Azərbaycan Dövlət İnformasiya Agentliyi
CƏMİYYƏT
Qızılcaya qarşı peyvənd olunmayanlar bu xəstəliyə yoluxduqda ağırlaşmalarla qarşılaşa bilərlər
28.02.2024 [15:23]
“Qızılca xəstəliyinin spesifik müalicəsi yoxdur və xəstəliyin yayılmasının qarşısını almaq üçün tövsiyə olunan intervalla peyvənd etdirmək lazımdır. Əks halda yoluxan şəxslər xəstəliyin ağırlaşmaları ilə qarşılaşa bilərlər”.
Bu fikirləri Səhiyyə Nazirliyinin rəsmi instaqram hesabında Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutunun infeksionisti Səbinə Cəfərova deyib.
Onun sözlərinə görə, peyvənd əsasən uşaqlıq dövründə (12 ay və 6 yaşda) vurulur. 2014-cü ildən vaksin preparatları Azərbaycana Səhiyyə Nazirliyi tərəfindən UNICEF-in xətti ilə gətirilir.
“Valideynlərin nəzərinə çatdırmaq istəyirəm ki, qızılcadan qorunmaq üçün Səhiyyə Nazirliyi tərəfindən təqdim olunan peyvənd cədvəlinə riayət etmək vacibdir. Həkim məsləhəti kimi valideynlərə bildirirəm ki, övladlarının sağlamlığına diqqətli olsunlar və yoluxma hallarının qarşısının alınması məqsədilə mütləq olaraq 1 və 6 yaşlarında onları 2 dəfə peyvənd etdirsinlər.
Bir daha valideynlərə xatırlatmaq istəyirəm ki, qızılca xəstəliyinin ötürülməsinin qarşısını almağının ən effektiv yolu vaksinasiyadır. Peyvənd, əsasən uşaqlıq dövründə (1 və 6 yaşlarında) vurulur”.
S.Cəfərova qeyd edib ki, hansısa bir səbəbdən peyvəndin ikinci dozasını vaxtında almayan 10 yaşa qədər uşaqlar tez bir zamanda peyvəndin ikinci dozasını almalıdırlar: “Peyvəndin hər iki dozasını vaxtında almayan 10 yaşa qədər uşaqlar minimum 4 həftə intervalla peyvəndin hər iki dozasını almaları tövsiyə olunur.
Valideynlərin nəzərinə çatdırmaq istəyirəm ki, uşaqları vaksinasiya üçün onlara yaşayış yeri üzrə ambulator-poliklinik xidmət göstərən tibb müəssisələrinə müraciət etsinlər”.