Heydər Əliyev adına Hərbi İnstitutda növbəti buraxılış mərasimi keçirilib
Hərbi institutda keçirilən mərasimdə müdafiə naziri general-polkovnik Zakir Həsənov və nazirliyin digər rəhbər heyəti iştirak edib.
Əvvəlcə xalqımızın Ümummilli Lideri Heydər Əliyevin hərbi institutun ərazisində ucaldılan abidəsi, eləcə də institutun Vətən müharibəsində şəhid olan hərbi qulluqçularının Xatirə kompleksi ziyarət olunub, qarşısına qızılgüllər düzülərək xatirələri dərin hörmətlə anılıb.
Hərbi orkestrin müşayiəti ilə Azərbaycan Respublikasının Dövlət Himni səsləndirilib. Heydər Əliyev adına Hərbi İnstitutun Döyüş bayrağı təntənəli surətdə sıra meydanına gətirilib.
General-polkovnik Z.Həsənov çıxış edərək mərasim iştirakçılarını Azərbaycan Respublikası Silahlı Qüvvələrinin yaradılmasının 106 illiyi münasibətilə təbrik edib, məzunlara gələcək xidmətlərində uğurlar arzulayıb.
Ordunun peşəkar kadr potensialının artırılması istiqamətində Heydər Əliyev adına Hərbi İnstitutunun və Hərbi Tibb Fakültəsinin müstəsna rolunu xüsusi qeyd edən nazir Prezident İlham Əliyevin rəhbərliyi ilə həyata keçirilən kompleks islahatlardan danışıb.
Silahlı Qüvvələrin Ali Baş Komandanının rəhbərliyi ilə aparılan Vətən müharibəsi və digər uğurlu əməliyyatlar zamanı Azərbaycan Ordusunun bütün hərbi qulluqçuları kimi, hərbi institutun məzunlarının da şücaətini xüsusi vurğulayan nazir hərbçilərimizin qəhrəmanlıqlarının dövlətimizin başçısı tərəfindən daim yüksək qiymətləndirildiyini qeyd edib.
Müdafiə naziri məzunlara ölkəmizin gələcəyi, ordumuzun, dövlətimizin müdafiə qüdrətinin daha da yüksəldilməsi naminə xidmətlərində uğurlar diləyib.
Gənc zabitlər göstərilən diqqət və qayğıya görə Azərbaycan Prezidentinə və Müdafiə Nazirliyinin rəhbərliyinə minnətdarlıqlarını bildirib, Vətənə, dövlətə və xalqa layiqincə xidmət edəcəklərinə söz veriblər.
General-polkovnik Z.Həsənov hərbi təhsil müəssisəsini fərqlənmə ilə bitirən məzunlara diplom və qiymətli hədiyyələr təqdim edib.
Sonra Heydər Əliyev adına Hərbi İnstitutun Döyüş bayrağının təhvili və qəbulu mərasimi keçirilib. Yaş kötüyünə simvollar vurulub. Heydər Əliyev adına Hərbi İnstitutun və Hərbi Tibb Fakültəsinin məzunlarına diplomlar təqdim olunub.
Kursantlar hərbi orkestrin müşayiəti ilə Hərbi İnstitutun marşını ifa ediblər.
Təntənəli mərasimin sonunda şəxsi heyətin tribuna önündən təntənəli keçidi olub.
