® Mərkəzi Gömrük Hospitalında qaraciyər və böyrək transplantasiyası əməliyyatları müxtəlif yaş qruplarında uğurla icra olunur
2023-cü ilin avqustundan etibarən İcbari Tibbi Sığorta üzrə Dövlət Agentliyinin xidmətlər zərfi çərçivəsində müasir təbabətin ən mürəkkəb cərrahi əməliyyatlarından sayılan böyrək və qaraciyər transplantasiyası əməliyyatları hospitalımızda mütəmadi olaraq həyata keçirilir və bu, tibb müəssisəsinin ən yüksək hazırlıq səviyyəsinin göstəricisidir. Sevindirici haldır ki, 2020-ci ilin fevralında Azərbaycanda ilk dəfə olaraq canlıdan qaraciyər transplantasiyası zamanı donor əməliyyatı tam laparoskopik üsulla Mərkəzi Gömrük Hospitalında icra olunub.
Cərrahiyyə və orqan transplantasiyası şöbəsində böyüklərdə və uşaqlarda qaraciyər və böyrək köçürmələri, qohum donordan uşaqlara qaraciyər köçürülməsi, qohum donordan böyüklərə və uşaqlara böyrək köçürülməsi, böyüklərdə və uşaqlarda orqan transplantasiyasına hazırlıq mərhələsində edilən əməliyyatlar aparılır.
Ən kiçik qaraciyər transplantasiyası olunan xəstə 6 aylıq, ən kiçik böyrək transplantasiyası olunan uşaq 4 yaşında olub. Şöbənin yüksəkixtisaslı cərrah-transplantoloqlar komandası tərəfindən bir xəstəyə eyni vaxtda həm qaraciyər, həm də böyrək transplantasiyası, tək seansda açıq ürək və qaraciyər transplantasiyası əməliyyatı da yerinə yetirilib. Donoru olmayan xəstələrə əməliyyat olunmaq şansı vermək üçün çarpaz transplantasiya da məhz şöbənin yüksəkixtisaslı mütəxəssisləri tərəfindən aparılır. Donorları uyğun olmayan xəstələr müvafiq surətdə aralarında donorlarını dəyişdirərək əməliyyat olunma fürsətini əldə edirlər.
İnnovativ tibbi avadanlıqlarla təchiz olunmuş əməliyyatxana, beynəlxalq keyfiyyət standartlarına uyğun tibbi xidmət, yüksəkixtisaslı və peşəkar cərrah-transplantoloqlar komandasının gərgin əməyi sayəsində Mərkəzi Gömrük Hospitalında orqan transplantologiyası yüksək inkişaf mərhələsinə çatdırılıb.
Orqan transplantasiyası möcüzədir! Orqan transplantasiyası həyatı xilas edir!
