Bakı, 18 oktyabr.

Oktyabrın 18-də Müstəqilliyin Bərpası Günü münasibətilə Dövlət Sərhəd Xidmətinin (DSX) Aparatında tədbir keçirilib.

DSX-nin mətbuat mərkəzindən verilən məlumata görə, əvvəlcə Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.

Sonra dövlətçiliyimizin qorunmasında və gücləndirilməsində Ulu Öndər Heydər Əliyevin misilsiz xidmətlərindən, Ümummilli Liderimizin layiqli davamçısı Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə düşmən üzərində qazanılan böyük Zəfərdə hərbi qulluqçularımızın gücündən və xalqımızın birliyindən danışılıb.

Dövlət Sərhəd Xidmətinin rəisi general-polkovnik Elçin Quliyev dövlət başçısının atdığı uğurlu addımlar nəticəsində ölkəmizin beynəlxalq aləmdə öz mövqeyini gücləndirdiyini, strateji əhəmiyyətli layihələrin həyata keçirilməsində mühüm uğurlara imza atıldığını, əhalinin ümumi rifah səviyyəsinin yaxşılaşdırılmasına yönəlmiş sosial-iqtisadi islahatların həyata keçirildiyini, sərhədlərimizin təhlükəsizliyinin təmin olunması istiqamətində nailiyyətlər əldə olunduğunu vurğulayıb.

Tədbirdə Müstəqilliyin Bərpası Gününün tarixi əhəmiyyətindən danışılıb, suverenliyi və ərazi bütövlüyü tam bərpa olunmuş ölkəmizin mühafizə və müdafiəsində müstəsna rolu olan sərhədçilərin Vətənə, xalqa və Ali Baş Komandana hər zaman sədaqətlə xidmət etdikləri, sərhədlərimizin toxunulmazlığını təmin etmək üçün böyük fədakarlıq göstərdikləri qeyd olunub.

Sonda Müstəqilliyin Bərpası Gününə həsr edilmiş sənədli filmə baxış olub.