Mehdi Hüseynzadə Azərbaycan xalqının qəhrəman oğludur və hər zaman belə də xatırlanacaq. Onun qəhrəmanlığının Vətən müharibəsində təkrarlanması qürurvericidir.
Bunu Sovet İttifaqı Qəhrəmanı Mehdi Hüseynzadənin anadan olmasının 105 illiyi münasibətilə verdiyi açıqlamada Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib.
Polkovnik İkinci Dünya müharibəsində faşizmə qarşı mübarizədə xalqımızın rolundan danışaraq deyib: “Azərbaycan xalqının İkinci Dünya müharibəsində faşizmə qarşı mübarizədə göstərdiyi igidlik nümunələri heç kimə sirr deyil. Təsadüfi deyil ki, dünyanın bir çox məşhur hərbi-siyasi xadimləri açıq şəkildə bildirib ki, əgər İkinci Dünya müharibəsi zamanı neft Bakısı – Azərbaycan faktoru olmasaydı, o zaman faşizmə qalib gəlmək mümkün olmazdı.
Xalqımız İkinci Dünya müharibəsində öz iqtisadi resursları ilə yanaşı, qəhrəman oğlan və qızları ilə də cəsarətlə iştirak edib, böyük qəhrəmanlıqlar göstərib. Sovet İttifaqı Qəhrəmanı, partizan hərəkatının ən fəal iştirakçılarından olan Mehdi Hüseynzadə də həmin qəhrəmanlardan biridir. Bu gün – qəhrəmanın anadan olmasının 105-ci ildönümündə bütün Azərbaycan xalqı onu hörmət və ehtiramla anır, Mehdi Hüseynzadə ismini gənc nəsillərə örnək göstərir.
Ulu Öndər Heydər Əliyevin təşəbbüsü ilə 1973-cü ildə Bakıda Mehdi Hüseynzadənin əzəmətli heykəli qoyulub, bir çox küçələrə onun adı verilib. 2006-cı ildə Prezident İlham Əliyevin Sloveniyaya səfəri zamanı əldə edilən razılaşmaya əsasən 2007-ci ildə qəhrəmanın abidəsinin açılışı olub”.
“Bizim üçün sevindiricidir ki, Mehdi Hüseynzadənin, Həzi Aslanovun və digər qəhrəmanların İkinci Dünya müharibəsində göstərdiyi igidlik nümunələri Vətən savaşında gənclərimiz tərəfindən təkrarlanaraq Vətən uğrunda yeni fədakarlıq örnəkləri yaradıblar. Gənclərimizin öz babalarının qəhrəmanlıqlarını erməni faşizminə qarşı mübarizədə uğurla təkrarlaması xalqımızın nə qədər böyük və qüdrətli olduğunu göstərməklə yanaşı, qəhrəmanlıq ənənələrinin də uğurla davam etdirildiyini göstərir. Bu, bir də onu göstərir ki, Azərbaycan xalqının qəhrəmanlıq ruhu əbədidir və bu ruh xalqımızla birlikdə həmişəlik yaşayacaq”, - deyə polkovnik fikrini yekunlaşdırıb.