Gələn il Azərbaycanın ictimai-siyasi həyatında iki əlamətdar hadisə baş verəcək. Fevralın 7-də xalqımız növbədənkənar prezident seçkilərində iştirak edərək Azərbaycanın liderini seçəcək. Digər möhtəşəm hadisə isə beynəlxalq səviyyəli tədbirin keçirilməsi ilə əlaqədar olacaq. Belə ki, Bakı 2024-cü ildə 80 min əcnəbinin təşrif buyuracağı COP29 sammitinə ev sahibliyi edəcək. Bununla bağlı, Prezident İlham Əliyevin 2024-cü ili “Yaşıl dünya naminə həmrəylik ili” elan etməsi də Azərbaycanın dünyanı dərindən maraqlandıran və narahat edən qlobal problemlərə önəm verdiyini təsdiqləməklə yanaşı, ölkəmizin beynəlxalq münasibətlərdə nüfuzunun daha da artmasına şərait yaradacaq.
Bu fikirləri Milli Məclisin deputatı, YAP İdarə Heyətinin üzvü, tibb elmləri doktoru Rəşad Mahmudov söyləyib.
Onun sözlərinə görə, son iyirmi ildə regionda baş verən bir çox proseslərdə Azərbaycanın rolu kifayət qədər böyük olub. Ötən müddət ərzində ölkəmiz bir çox transmilli iqtisadi layihələrdə əsas aktorlardan biri kimi çıxış edib, regional geosiyasi proseslərdə aydın və qətiyyətli mövqeyini ifadə etməklə öz milli maraqlarını müdafiə etmək qabiliyyətini nümayiş etdirib. Bu da təsadüfi deyil, Azərbaycanın xarici siyasəti ciddi siyasi fəlsəfə üzərində qurulub. Eyni zamanda, belə güclü mövqeyə malik, qətiyyətli, aydın və prinsipial siyasi kursu ilə tanınan Azərbaycan dünyanı narahat edən problemlərin həllində də öz töhfəsini verməklə fərqlənib.
ABŞ Prezidentinin milli təhlükəsizlik məsələləri üzrə sabiq müşaviri, Beynəlxalq Strateji Araşdırmalar Mərkəzinin məsləhətçisi, məşhur siyasi xadim Zbiqnev Bjezinskinin də qeyd etdiyi kimi, Azərbaycan regionda mühüm aktor olmaqla özünü uğurla inkişaf edən dövlət kimi təsdiqləyib. Böyük güclərin gərgin qarşıdurması və təzyiqləri fonunda Azərbaycan tərəfdaşları ilə reallaşdırdığı strateji əhəmiyyətli meqalayihələr sayəsində Cənubi Qafqaz regionunun geosiyasi və geoiqtisadi landşaftını dəyişdirməklə yanaşı, sosial-iqtisadi inkişafında da güclü tərəqqiyə imza atmağı bacarıb.
Müstəqilliyini bərpa etdikdən 30 il sonra Azərbaycan kifayət qədər uğurlu dövlət olduğunu, öz milli maraqlarına uyğun beynəlxalq və daxili siyasət aparmağa qadir olduğunu fəaliyyəti ilə sübut edib. Hazırda neft və qaz ehtiyatlarından səmərəli istifadə sayəsində Azərbaycan digər əsas yanacaq ixracatçıları ilə birlikdə yüksək səviyyədə enerji təhlükəsizliyinə malikdir və bu potensialından başqa ölkələrin də faydalanmasına şərait yaradır. Bakı-Tbilisi-Ceyhan neft, Bakı-Tbilisi-Ərzurum qaz boru kəmərləri, TAP, TANAP və digər enerji layihələri “köhnə dünya”nın enerji təhlükəsizliyinin təmin olunmasında vacib rol oynayır. Məhz bu layihələrin sayəsində Azərbaycan Avropanın yeni enerji xəritəsinin çəkilməsinə öz töhfəsini verib. Ən əsası, Azərbaycan özünü siyasi konyukturadan asılı olmayan etibarlı təchizatçı kimi göstərib və bu da ancaq güclü və sabit, eyni zamanda, sözünün arxasında konkret əməlin dayandığını elan edən dövlət rəhbərinin olduğu ölkədə mümkündür.
Ümumiyyətlə, ənənəvi enerji ilə yanaşı, Azərbaycan “yaşıl enerji” sektorunun inkişafına da xüsusi əhəmiyyət verir. Bərpaolunan enerjinin inkişafı ölkəmiz üçün prioritet məsələdir. Respublikamız neft-qaz sektorunun inkişafı və tullantıların azaldılması ilə yanaşı, “yaşıl enerji”yə keçid siyasətini də sürətlə həyata keçirir. Prezidentin imzaladığı son Sərəncamda da qeyd edildiyi kimi, Azərbaycanın 2030-cu ilə qədər sosial-iqtisadi inkişafa dair 5 milli prioritetindən biri “Təmiz ətraf mühit və yaşıl artım ölkəsi” kimi müəyyən olunub. “Yaşıl enerji”yə keçidin məqsədi qısa müddət ərzində dünya iqtisadiyyatının enerji əsaslarını tamamilə dəyişdirməkdir. Azərbaycanda “yaşıl enerji”nin böyük potensialı var və bəşəri problemlərə hər zaman xüsusi həssaslıqla yanaşan və köməyini əsirgəməyən ölkəmiz bu potensialından istifadə edərək, dünyanın daha da yaşıllaşmasına öz töhfəsini verməyə hazır olduğunu bildirir. Bu mənada BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası – COP29 kimi mötəbər bir tədbirin Azərbaycanda keçirilməsi istər regional, istərsə də qlobal müstəvidə xüsusi əhəmiyyət daşıyır.
Prezident İlham Əliyev gələn ili “Yaşıl dünya naminə həmrəylik ili” elan etdi. Bu Sərəncam ənənəvi enerji sektorunda beynəlxalq əhəmiyyətli iri layihələrin uğurla həyata keçirilməsindən sonra “yaşıl enerji”nin mühüm təchizatçısı olmaq yolunda inamla irəliləyən Azərbaycan üçün yeni perspektivlər və imkanlar açır. Eyni zamanda, genişmiqyaslı layihələrin, işğaldan azad edilmiş ərazilərdə, o cümlədən Qarabağda və Şərqi Zəngəzurda, habelə Naxçıvan Muxtar Respublikasında “yaşıl enerji” zonasının yaradılması Azərbaycanın alternativ enerji istehsalçısı və ixracatçısına çevrilməsinə imkan verəcək.
Deputat sonda qeyd edib ki, Prezident İlham Əliyevin Sərəncamı ilə Azərbaycanda 2024-cü ilin “Yaşıl dünya naminə həmrəylik ili” elan edilməsi təkcə ölkəmiz üçün deyil, qlobal miqyas üçün də faydalı olacaq. Birmənalı şəkildə, dövlət başçımızın məlum Sərəncamı ilə çirklənmiş ərazilərin bərpası sürətləndiriləcək, ekoloji problemlərin həllinə önəmli töhfəsini verəcək.