Vəkilliyə qəbul üzrə ixtisas imtahanının yazılı test mərhələsindən müvəffəqiyyətlə keçən vəkilliyə namizədlərin peşə yararlılığının yoxlanılması məqsədilə ötən il noyabrın 7-dən bu il yanvarın 9-dək ixtisas imtahanının şifahi müsahibə mərhələləri keçirilib.
Vəkillərin İxtisas Komissiyasından verilən məlumata görə, şifahi müsahibə mərhələsində 67 vəkilliyə namizəd iştirak edib.
İmtahanların nəticələrinə görə, Vəkillərin İxtisas Komissiyasının peşə yararlılığına dair rəyini alan 52 nəfər vəkilliyə namizəd icbari təlimə buraxılıb. Ədliyyə Akademiyasında keçirilməsi nəzərdə tutulan icbari təlimin vaxtı ilə bağlı namizədlərə əlavə məlumat veriləcək.