Müdafiə Nazirliyi: Türkiyə beynəlxalq aləmdə sülh və təhlükəsizliyə töhfə verməyə davam edəcək
DÜNYA
Müdafiə Nazirliyi: Türkiyə beynəlxalq aləmdə sülh və təhlükəsizliyə töhfə verməyə davam edəcək
30.05.2024 [00:44
Müdafiə Nazirliyi: Türkiyə beynəlxalq aləmdə sülh və təhlükəsizliyə töhfə verməyə davam edəcək
İzmir, 30 may,
Türk ordusu beynəlxalq aləmdə sülh və təhlükəsizliyin təmin olunmasına töhfə verməyə davam edəcək. Eləcə də bütün qarşıya qoyulmuş vəzifələri yerinə yetirməyə hazırdır.
Bunu Türkiyə Milli Müdafiə Nazirliyinin rəsmi nümayəndəsi, kontr-admiral Zeki Aktürk İzmirdəki “EFES-2024” təlimləri çərçivəsində təşkil olunan həftəlik mətbuat konfransında bildirib.
Onun sözlərinə görə, ölkənin milli təhlükəsizliyinə təhdidlərin aradan qaldırılması üçün qətiyyətli addımlar atılır.
“Təkcə son həftədə Türkiyə ordusu regionda 44 terrorçunu zərərsizləşdirib, ümumilikdə isə ilin əvvəlindən cinayətkar təşkilatların 1092 üzvü məhv edilib”, - deyə Z.Aktürk bildirib.
Vurğulayıb ki, terrorçularla mübarizə həm Türkiyədə, həm də İraq və Suriyanın sərhəd rayonlarında aparılır.
O xatırladıb ki, Türkiyənin təhlükəsizliyini müxtəlif qanlı təşkilatlar təhdid edir: "Terrorizmə qarşı mübarizə hərtərəfli və bütün qətiyyətlə davam etdirilir".
“EFES-2024 təlimləri çərçivəsində, o cümlədən Suriya və İraqdakı “Fərat Qalxanı”, “Zeytun budağı”, “Sülh mənbəyi”, “Bahar qalxanı” və “Pəncə” antiterror əməliyyatı zonalarında milli təhlükəsizliyə qarşı təhdidlərə qarşı mübarizədə türk ordusunun topladığı nəhəng təcrübədən istifadə edilir”, – deyə admiral əlavə edib.
O qeyd edib ki, hazırkı təlimlərin ssenarisi əvvəlkilərdən fərqlənir və təhdidlərlə mübarizənin hibrid üsullarını nəzərdə tutur. “Təlimlər yaşayış məntəqələrində əməliyyatların aparılması, dəniz və havadan xüsusi təyinatlıların desant edilməsi, girovların xilas edilməsi və s. nəzərdə tutur. Müxtəlif qoşun növlərinin hərəkətlərinin əlaqələndirilməsi üzərində iş aparılır. Eyni zamanda, informasiya təhlükəsizliyi və kiberhücumlarla mübarizə üsullarının vahid meyarları formalaşdırılır”, - deyə Zeki Aktürk bildirib.
Sonda Türkiyə Müdafiə Nazirliyinin nümayəndəsi bir daha Azərbaycan xalqını Müstəqillik Günü münasibətilə təbrik edib və vurğulayıb ki, hər iki dövlət “Bir millət, iki dövlət” şüarına uyğun olaraq əməkdaşlığı dərinləşdirir.
