Dövlət Gömrük Komitəsinin yaradılması münasibətilə tədbir keçirilib
Ğömrük əməkdaşları peşə bayramı münasibətilə Fəxri xiyabana gələrək Ümummilli Lider Heydər Əliyevin xatirəsini ehtiramla yad edib, məzarı önünə əklil qoyublar. Sonra Şəhidlər Xiyabanını ziyarət ediblər. Daha sonra DGK əməkdaşlarının iştirakı ilə tədbir keçirilib.
Tədbirdə çıxış edən Dövlət Gömrük Komitəsinin sədri Şahin Bağırov bildirib ki, Müzəffər Ali Baş Komandan İlham Əliyevin rəhbərliyi ilə ərazi bütövlüyümüzün tam bərpa olunduğu 2023-cü il ölkəmizin tarixində bütün sahələrdə nailiyyətlər ili kimi qalacaq. O da qeyd olunub ki, bu tarixi qələbə Ümummilli Lider Heydər Əliyev tərəfindən müəyyənləşdirilən siyasi kursun Prezident İlham Əliyev tərəfindən uğurla davam etdirilməsinin nəticəsidir.
Diqqətə çatdırılıb ki, gömrük orqanlarının fəaliyyəti Prezident İlham Əliyev tərəfindən müəyyənləşdirilən strateji hədəflərə uyğun şəkildə təşkil olunur. Şahin Bağırov əlavə edib ki, DGK ötən ildə qarşıya qoyulmuş vəzifələri yüksək səviyyədə yerinə yetirmək məqsədilə gömrük rəsmiləşdirilməsinin sadələşdirilməsi, çevik və şəffaf idarəetmə sisteminin tətbiqi, habelə gömrük inzibatçılığının normativ-hüquqi bazasının təkmilləşdirilməsi istiqamətində müvafiq tədbirlər həyata keçirib.
Qeyd edilib ki, ötən il gömrük sahəsinin təkmilləşdirilməsi sahəsində bir sıra mühüm islahatlar aparılıb. Belə ki, “Gömrük İNKİŞAF Modeli”nin bir sıra layihələrinin, o cümlədən Avtomatlaşdırılmış Risk Analiz Sisteminin (ARAS), Transxəzər Gömrük Tranzit Portalının, “Səlahiyyətli İqtisadi Operator proqramının və “Smart-Bot” mobil tətbiqi layihələrinin biznes ictimaiyyətinə geniş təqdimatları həyata keçirilib.
Daha sonra ötən gün Prezident İlham Əliyevin imzaladığı sərəncamla general rütbəsi alan əməkdaşlara rütbələri təqdim olunub.
Tədbirin sonunda DGK-nin bir illik fəaliyyətini əks etdirən video-çarx nümayiş olunub.
