Parlamentin sədri: Qırğızıstan Azərbaycanla qədim tarixi bağlara əsaslanan qardaşlıq münasibətlərinə önəm verir
SİYASƏT
Parlamentin sədri: Qırğızıstan Azərbaycanla qədim tarixi bağlara əsaslanan qardaşlıq münasibətlərinə önəm verir
09.04.2024 [15:42]
Azərbaycanın xarici işlər naziri Ceyhun Bayramov Qırğızıstan parlamentinin sədri Nurlanbek Şakiyev ilə görüşüb.
Xarici İşlər Nazirliyinin Mətbuat xidməti idarəsindən bildirilib ki, görüş zamanı iki ölkə arasında müxtəlif sahələrdə strateji əməkdaşlıq münasibətləri, əməkdaşlığın perspektivləri və parlamentlərarası əlaqələr barədə fikir mübadiləsi aparılıb.
Ceyhun Bayramov Azərbaycan ilə Qırğızıstan arasında tarixi dostluq və qardaşlıq əlaqələrinin ölkə liderləri arasında mövcud qarşılıqlı etimad və siyasi dialoq nəticəsində daha da möhkəmlənərək “Azərbaycan Respublikası və Qırğız Respublikası arasında Strateji Tərəfdaşlıq haqqında Bəyannamə” ilə təsbitini tapdığını məmnunluqla qeyd edib. Qarşılıqlı səfər və təmasların mövcud strateji tərəfdaşlıq münasibətlərinin inkişafı, habelə müqavilə-hüquq bazasının genişləndirilməsinə təkan verdiyi diqqətə çatdırılıb.
Nazir xüsusilə parlamentlərarası müstəvidə ölkələrin bir-birinin mövqeyinə qarşılıqlı dəstək göstərməsinin vacibliyi qeyd edilib, parlamentlərarası əlaqələrin inkişafı üçün geniş perspektivlərin olduğunu vurğulayıb.
Bununla yanaşı, regional və beynəlxalq təşkilatlar çərçivəsində münasibətlərin inkişafının önəmi qeyd olunub. Xüsusilə Türk Dövlətləri Təşkilatı (TDT) çərçivəsində əməkdaşlığın geniş perspektivlərinin mövcudluğu, habelə mövcud potensialdan istifadə olunması istiqamətində TDT-yə üzv dövlətlər arasında intensiv təmasların vacibliyi diqqətə çatdırılıb. Bu xüsusda, TDT-nin iyulda Şuşada keçiriləcək növbədənkənar zirvə görüşünün və oktyabrda Bişkekdə təşkil ediləcək rəsmi sammitin Təşkilatın inkişafına xidmət edəcək təmaslardan biri olacağına dair inam bildirilib.
Qırğızıstan parlamentinin sədri, həmçinin COP29-a hazırlıq işləri, Azərbaycan ilə Ermənistan arasında normallaşma prosesi barədə məlumat verilib.
Nurlanbek Şakiyev ölkəsinin Azərbaycanla qədim tarixi bağlara əsaslanan qardaşlıq münasibətlərinə önəm verdiyini və yuxarıda qeyd olunan sahələrdə əməkdaşlığın təkmilləşdirilməsi perspektivlərinin mövcudluğunu qeyd edib. Ötən il Ulu Öndər Heydər Əliyevin 100 illik yubileyi ilə bağlı tədbirdə iştirak məqsədilə ölkəmizə səfərini məmnunluqla xatırlayan spiker iki ölkənin parlamentləri arasında əməkdaşlığın gündən-günə dərinləşdiyini vurğulayıb.
Görüşdə, həmçinin digər qarşılıqlı maraq doğuran ikitərəfli və çoxtərəfli məsələlər müzakirə edilib.
