Bakıda Azərbaycanla Almaniya arasında siyasi, iqtisadi və səhiyyə sahələrində əməkdaşlıq müzakirə edilib
Sentyabrın 25-də Bakıda Azərbaycan Respublikası və Almaniya Federativ Respublikası Xarici İşlər nazirlikləri arasında siyasi məsləhətləşmələrin növbəti raundu keçirilib.
Bu barədə Xarici İşlər Nazirliyi məlumat yayıb.
Azərbaycan Respublikasının nümayəndə heyətinə xarici işlər nazirinin müavini Fariz Rzayev, Almaniya Federativ Respublikasının nümayəndə heyətinə Xarici İşlər Nazirliyinin Şərqi Avropa, Qafqaz və Mərkəzi Asiya üzrə müvəkkili Konrad Arz von Strausenburg rəhbərlik edib. Məsləhətləşmələr zamanı iki ölkə arasında siyasi, iqtisadi, o cümlədən energetika və nəqliyyat, habelə humanitar, xüsusilə təhsil və səhiyyə sahələrində əməkdaşlığın hazırkı vəziyyəti və inkişaf perspektivləri, eləcə də müqavilə-hüquq bazanın genişləndirilməsi ilə bağlı müzakirələr aparılıb. Həmçinin beynəlxalq təşkilatlar çərçivəsində əməkdaşlıq məsələləri müzakirələrdə diqqət mərkəzində olub. Bu xüsusda 2024-cü ilin noyabr ayında Azərbaycanda keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının sessiyasına (COP29) hazırlıq və görüləcək işlərlə bağlı qarşı tərəf məlumatlandırılıb. Görüşdə postmünaqişə dövründə bölgədəki vəziyyət, Azərbaycan tərəfindən bölgədə davamlı sülhün bərqərar olunması istiqamətində atılan addımlar, işğaldan azad edilmiş ərazilərimizdə mina problemi, orada həyata keçirilən genişmiqyaslı bərpa-quruculuq işləri barədə ətraflı məlumat verilib. Siyasi məsləhətləşmələr zamanı birgə maraq kəsb edən digər mövzular da müzakirə olunub.
