Azərbaycan Respublikasının İsveç Krallığındakı səfiri Zaur Əhmədov bu ölkənin “Diplomaticworld Sweden” portalına müsahibə verib.
Səfir müsahibəsində 2024-cü ildə BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi edəcək və Avropa ilə Asiyanın qovşağında körpü rolunu oynayan Azərbaycanın bu mötəbər beynəlxalq tədbiri yüksək səviyyədə keçirmək əzmində olduğunu bildirib.
Müsahibədə Prezident İlham Əliyevin sədrliyi ilə keçirilmiş COP29-a ilk hazırlıq iclası haqqında məlumat verilib, Azərbaycanın müstəqil siyasətinin, beynəlxalq hüququn normalarına hörmətinin beynəlxalq müstəvidə daim təşviq olunduğu vurğulanıb. Ölkəmizin, eyni zamanda, Beynəlxalq Astronavtika Konqresi də daxil olmaqla, indiyədək bir çox vacib beynəlxalq tədbirlərə yüksək səviyyədə və uğurla ev sahibliyi etməsinin beynəlxalq ictimaiyyətin ölkəmizə böyük etimadını şərtləndirən amillər sırasında olduğu diqqətə çatdırılıb.
Habelə neft və qazla zəngin Azərbaycanın 2030-cu ilədək enerjisinin 30 faizini bərpaolunan mənbələrdən əldə etmək məqsədinə çatmasını təmin edəcək yaşıl enerji təşəbbüsləri və yaşıl enerjiyə keçidlə bağlı atdığı addımlar barədə məlumat verilib.
Diplomat COP29-un Bakıda keçirilməsi barədə qərarın ikitərəfli danışıqlar nəticəsində normallaşma istiqamətində Azərbaycan və Ermənistanın birgə atdığı addımlar fonunda baş tutduğuna diqqət çəkərək, iqlim dəyişikliyi probleminin beynəlxalq səylərlə vaxtında həlli üçün regional tərəfdaşlığın və davamlı sülhün vacibliyini vurğulayıb.