Azərbaycanda keçiriləcək növbədənkənar prezident seçkiləri özünəməxsus mənada əlamətdar və simvolikdir. Bu, ərazi bütövlüyünü bərpa etmiş qalib ölkədə keçirilən prezident seçkiləridir.
Bu fikri ukraynalı siyasi ekspert Andriy Lebid söyləyib.
Onun sözlərinə görə, Azərbaycanda keçiriləcək növbədənkənar prezident seçkiləri yeni reallığın, yeni vəzifələrin, məqsəd və istəklərin səbəbi, nəticəsidir: “Bu gün Azərbaycanın təşəbbüsləri, gələcəklə bağlı proqnozları, xüsusən də azərbaycanlıların milli ideyasının əsaslarının müzakirəsi hər zamankından daha çox diqqət mərkəzindədir”.
Ukraynalı ekspert xatırladıb ki, bütün Azərbaycan xalqı bir yumruq kimi birləşərək tarixi ərazilərini işğaldan azad etdi. Azərbaycanlıların milli ideyasından danışan Andriy Lebid əlavə edib ki, yeni dövrün yeni hədəfləri olmalıdır.
Onun sözlərinə görə, məhz Azərbaycan və azərbaycanlılar qlobal miqyasda transformasiyaya səbəb olublar.
“Müasir Azərbaycan xalq-iqtidar birliyi, demokratikləşmə və qanunun aliliyi prinsipləri əsasında sabitliyin və firavanlığın təmin edilməsinə, daha da inkişafa, beynəlxalq təsirə yol açacaq. Bugünkü Azərbaycan dünyanın ən qüdrətli dövlətlərindən biridir və bir çoxlarına nümunə ola bilər. Azərbaycanın məqsədi müasir dünyada gedən proseslərlə ayaqlaşmaqdır. Üstəlik, qlobal inkişafın və dünya nizamının dəb və vektorlarını müəyyən etmək vacibdir. Yeni dövr başlayır və bu, Azərbaycan üçün uğurlu olacaq”, - deyə Andriy Lebid qeyd edib.