Prokuror: Əmək müqaviləsinin bağlanması yalnız kağız üzərində sənədi imzalamaqla məhdudlaşmır
Əmək münasibətlərinin əsas prinsiplərindən biri ondan ibarətdir ki, heç kim məcburi qaydada əmək müqaviləsi bağlamağa və ya əmək münasibətlərinə cəlb oluna bilməz. Əmək müqaviləsi könüllülük və tərəflərin qarşılıqlı razılığı əsasında bağlanmalıdır.
Bunu Yasamal Rayon Prokurorluğunun inzibati binasında keçirilən “Açıq qapı” günü və “Əmək hüquqlarının müdafiəsində prokurorluğun, medianın və vətəndaş cəmiyyətinin rolu” mövzusuna həsr olunan seminar çərçivəsində Yasamal rayon prokuroru Elman Süleymanov söyləyib.
Prokuror bildirib ki, müqavilədə həm işçinin, həm də işəgötürənin hüquq və vəzifələri, iş şəraiti, əmək funksiyaları və digər mühüm məsələlər aydın şəkildə öz əksini tapmalıdır. Xüsusilə əməyin mühafizəsi, sağlam və təhlükəsiz iş şəraitinin təmin edilməsi ilə bağlı öhdəliklər də müqavilədə müəyyənləşdirilməlidir. Əmək müqaviləsinin olmaması iş prosesində baş verə biləcək hər hansı hadisənin və ya əmək mübahisəsinin araşdırılması zamanı ciddi çətinliklər yaradır. Bu baxımdan əmək müqaviləsinin bağlanması həm işçinin, həm də işəgötürənin hüquqlarının qorunması üçün mühüm əhəmiyyət daşıyır.
“Əmək müqaviləsinin bağlanması yalnız kağız üzərində sənədi imzalamaqla məhdudlaşmır. Qanunvericiliyə uyğun olaraq, müqavilə elektron informasiya sistemində də qeydiyyata alınmalıdır. Müvafiq qaydada elektron qeydiyyatdan keçməyən əmək müqaviləsi hüquqi nəticələr doğurmur. Bu səbəbdən belə halların qarşısının alınması məqsədilə qanunvericilikdə müxtəlif məsuliyyət tədbirləri, o cümlədən inzibati və bəzi hallarda cinayət məsuliyyəti nəzərdə tutulub”,- deyə prokuror diqqətə çatdırıb.
