Ağcabədidə Gənclər üçün Təhsil Mərkəzi (GTM) Qarabağ Regional ofisinin təşəbbüsü, Ağcabədi regional “ASAN xidmət” mərkəzinin, Regional İnkişaf İctimai Birliyinin (RİİB) Qarabağ bölməsinin, Gənclərin İnkişaf və Karyera Mərkəzinin (GİKM) Qarabağ nümayəndəliyinin birgə təşkilatçılığı ilə 2 Fevral - Azərbaycan Gəncləri Gününə həsr olunmuş tədbir keçirilib.
Əvvəlcə könüllülər tərəfindən yaradılmış müxtəlif guşələrdə rəsm, lent boya və dənli bitkilərdən ibarət əl işləri, zər sənəti üzrə master klasslar təşkil edilib.
Tədbir Azərbaycanın Dövlət Himninin səsləndirilməsi ilə başlayıb. Ulu Öndər Heydər Əliyevin və şəhidlərimizin xatirəsi bir dəqiqəlik sükutla yad edilib.
GTM-in Qarabağ regional ofisinin əməkdaşı Aygün Əlizadə, “N” saylı hərbi hissənin zabiti Əlibəy Novruzbəyov, Ağcabədi regional “ASAN xidmət” mərkəzinin əməkdaşı Pərviz Səmədov, RİİB-in Qarabağ bölməsinin əməkdaşı Elxan Məmmədov, GİKM-in Qarabağ nümayəndəliyinin əməkdaşı Ləman Zeynalova gəncləri əlamətdar gün münasibətilə təbrik edib, ölkəmizdə gənc nəslə göstərilən diqqət və qayğıdan söz açıblar. Bildirilib ki, Azərbaycan gəncləri Ümummilli Lider Heydər Əliyev tərəfindən təsis olunan bu günü qalib ölkənin qürurlu vətəndaşları kimi böyük ruh yüksəkliyi ilə qeyd edirlər.
Sonda istedadlı gənclər tərəfindən musiqili kompozisiya nümayiş etdirilib, 2 Fevral – Gənclər Günü münasibətilə keçirilən tədbir maraqlı və yaddaqalan olub.