Bu yaxınlarda aparılan bir araşdırma B12 vitamini ilə ürək xəstəliyi, diabet və neyrodegenerativ xəstəliklər də daxil bir sıra ciddi sağlamlıq problemlərinə səbəb olan xroniki iltihab arasında xüsusi əlaqəni üzə çıxarıb.
“Knowridge” saytına istinadla xəbər verir ki, “Journal of Food and Agriculture” nəşrində dərc olunan tədqiqat B12 vitamininin həm insanlarda, həm də siçanlarda iltihabın əsas markerlərinə necə təsir etdiyinə yönəlib. Məhz bu vitamin xüsusilə sinir, DNT və qırmızı qan hüceyrələrinin istehsalı üçün vacibdir. Onun bədəndə kəskin çatışmazlığı nevroloji pozğunluq kimi ağırlaşmalara səbəb ola bilər.
Əvvəlki araşdırmalar B12 vitamininin iltihabı azaltmağa kömək edə biləcəyini irəli sürsə də, bu əlaqənin dəqiq sübutu indiyə qədər tam müəyyənləşməyib. İspaniyalı tədqiqatçılar B12 vitamini səviyyəsinin iki xüsusi iltihabi markerə necə təsir etdiyinə diqqət yetiriblər: interleykin-6 (IL-6) və C-reaktiv protein (CRP).
Tədqiqatlarını aparmaq üçün komanda İspaniyada Aralıq dənizi pəhrizinin ürək-damar xəstəliklərinin qarşısının alınmasına təsirini araşdıran böyük bir klinik sınaq olan “PREDIMED” iştirakçılarının məlumatlarından istifadə edib. Bu məqsədlə B12 vitamini, habelə IL-6 və CRP səviyyələrini ölçmək üçün iştirakçıların qanı analiz olunub. Tapıntılar əks-əlaqəni göstərib: B12 vitamini çox olanlarda iltihab markerləri aşağı səviyyəyə enib. Nəticə bu vitaminin adekvat səviyyədə saxlanmasının potensial olaraq iltihabı idarə etməyə və əlaqəli xəstəliklərin qarşısının alınmasına kömək edə biləcəyini göstərir.
Araşdırma potensial müalicə vasitəsi kimi B12 vitamini ilə bağlı əlavə tədqiqatlara yol açır. Onlar nəticələrin müxtəlif yaşlar üzrə doğru olub-olmadığını yoxlamaq və B12 vitamini çatışmazlığı, infeksiyalar, yaşlanma prosesinin xroniki iltihabla qarşılıqlı əlaqəsini araşdırmaq üçün tədqiqata daha müxtəlif qrupları cəlb etmək niyyətindədir.
Bu tədqiqat iltihabla mübarizədə B12 vitamininin potensial rolunu vurğulayır və xəstəliklərin idarə olunmasında, həmçinin qarşısının alınmasında onun daha geniş tətbiqini dəstəkləyir.