Bakı, 26 avqust.

“Prezident İlham Əliyevin rəhbərliyi ilə həyata keçirilən uğurlu xarici siyasət Azərbaycanın müxtəlif dövlətlər, eləcə də, Mərkəzi Asiya ölkələri ilə ikitərəfli əlaqələrin sürətli inkişafına təkan verir. Bu baxımdan Özbəkistanla əlaqələr mühüm əhəmiyyət kəsb edir. Hər iki ölkə liderlərinin qarşılıqlı səfərləri türk dövlətləri arasında əlaqələrin və strateji tərəfdaşlığın inkişaf etdirilməsi baxımından mühüm tarixi hadisədir. Bu səfərlər, habelə səfər çərçivəsində imzalanan sənədlər Azərbaycan və özbək xalqları arasında dostluğun, qardaşlığın əyani təzahürüdür. İki ölkə arasında qarşılıqlı münasibətlərin tarixi uzaq əsrlərə gedib çıxır. Özbək və Azərbaycan xalqlarını yaxın milli adət və ənənələr, ümumi dil qrupu, mədəniyyət və din birləşdirir. İki ölkə arasında diplomatik əlaqələr 1995-cü ilin oktyabrın 2-də qurulub. Həmin vaxtdan başlayaraq, əlaqələr getdikcə daha da möhkəmlənib”.

Bu fikirləri açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.

Hüquq müdafiəçisi Azərbaycan ilə Özbəkistan arasında münasibətlərin yeni müstəviyə qədəm qoymasından söhbət açaraq Prezident İlham Əliyevin son iki ildə Özbəkistana beş dəfə səfər etməsini etibarlı münasibətlərin göstəricisi olduğunu bildirib: “Dövlətimizin başçısının Özbəkistana budəfəki rəsmi səfəri isə daha çox yadda qalan olacaq. Çünki səfər çərçivəsində iki ölkə arasında müttəfiqlik münasibətləri haqqında müqavilə imzalandı. Hesab edirəm ki, bu, ən yüksək beynəlxalq sənəddir. Artıq iki qardaş xalq, iki müstəqil, güclü, suveren, nüfuzlu dövlət rəsmi müttəfiq oldular. Bu, çox mühüm xarici siyasət addımıdır və gələcək illərdə münasibətlərimizi, həmçinin bir çox hallarda regional siyasəti müəyyən edəcək. Artıq dünya birliyi də şahiddir ki, bu gün Mərkəzi Asiya, Cənubi Qafqaz, Xəzər regionları vahid geosiyasi regiona çevrilir və regionlarımızda müsbət proseslər Özbəkistan ilə Azərbaycan arasında səmərəli əməkdaşlıqdan asılıdır”.

Tanınmış hüquqşünas dövlətimizin başçısının səfər çərçivəsində Özbəkistanın işgüzar dairələrinin nümayəndələri ilə görüşü zamanı çıxışına da münasibət bildirib. Deyib ki, Daşkənddə keçirilən biznes-forum layihələrlə çox zəngin olub. 20 istiqamət üzrə irəli sürülmüş yeni təşəbbüslər əməkdaşlıq əlaqələrini daha zəngin edəcəkdir.

“Prezident İlham Əliyev çıxışı zamanı “Böyük Qayıdış” proqramı barədə də məlumat verib” - deyən Ç.Qənizadə bildirib ki, bu proqram kifayət qədər genişmiqyaslıdır.

“Səfər çərçivəsində iki ölkə prezidentlərinin iştirakı ilə “Azərbaycan Respublikası ilə Özbəkistan Respublikası arasında müttəfiqlik münasibətləri haqqında Müqavilə”, həmçinin bir sıra sahələrdə əməkdaşlığı möhkəmləndirəcək sənədlər imzalandı. Bütün bunlar Azərbaycan-Özbəkistan münasibətlərinin yeni müstəviyə qədəm qoyduğunu təsdiqləyir”- deyə Ç.Qənizadə bildirib.