Azərbaycan Dövlət İnformasiya Agentliyi
CƏMİYYƏT
Qazi: Bu il dövlət başçısı işğal altındakı bütün torpaqlarımızda Azərbaycan bayrağını dalğalandırdı
Qazi: Bu il dövlət başçısı işğal altındakı bütün torpaqlarımızda Azərbaycan bayrağını dalğalandırdı
Bu il Ulu Öndər Heydər Əliyevin 100-ci ildönümü ilə əlaqədar Azərbaycan Prezidenti İlham Əliyev tərəfindən “Heydər Əliyev İli” elan edilmişdi. Bizim üçün bu ilin əhəmiyyəti odur ki, 2023-cü il həqiqətən qələbələrlə doludur. Dahi şəxsiyyətlə bağlı həm ölkəmizdə və onun hüdudlarında, müxtəlif yerlərdə tədbirlər təşkil olundu. Dövlətimizin başçısı həm ata nəsihətini yerinə yetirdi, həm birliyə və həmrəyliyə nail oldu. Həm də Azərbaycan Ordusu antiterror tədbirləri nəticəsində işğal altında qalan tarixi torpaqlarımızı düşməndən təmizlədi, suverenliyimiz tam bərpa olundu. Nəticədə həmin ərazilərdə Ali Baş Komandanımız dövlət bayrağımızı dalğalandırdı. Bu da onu göstərdi ki, atanın izi ilə gedən oğlun - liderin zəhməti Qələbə ilə yekunlaşmalı idi. Çünki Prezident İlham Əliyev elə siyasi məktəb keçmişdi ki, bunun sonu da hazırkı çiçəklənən Azərbaycan dövləti və qürurlu xalqımızdır.
Bu barədə Azərbaycan Qarabağ Müharibəsi Əlilləri, Veteranları və Şəhid Ailələrinin Hüquqlarının Müdafiəsi İctimai Birliyinin sədri müavini, Vətən müharibəsi əlili, üçüncü qrup Qarabağ qazisi Ramin Şirinov AZƏRTAC-a açıqlamasında söyləyib.
Xankəndidəki futbol oyunundan sonra Prezidentlə görüşdə dedim ki,
bir əsgər kimi bütün əmrləri yerinə yetirməyə hazırıq
İctimai Birliyin sədri müavini daha sonra deyib: “Mən Xankəndidə keçirilmiş “Qarabağ”-MOİK futbol komandalarının oyunu zamanı Prezident İlham Əliyevlə stadionda görüşdüm və danışdım. Orada ona dedim ki, biz belə müdrik liderimiz və Prezidentimizin olması ilə fəxr edirik. Bir əsgər olaraq da verdiyiniz əmr və tapşırıqları daim yerinə yetirməyə hazırıq”.
İkinci Qarabağ savaşındakı döyüş yolundan danışan Ramin Şirinov vurğulayıb ki, Vətən müharibəsi qırx dörd günlük döyüş olsa da, onun üçün ən böyük qisas almaq hissi idi: “Çünki mən özüm döyüş bölgəsində - Goranboy rayonunun Xan Qərvənd kəndində böyümüşəm. Atam və əmilərim müharibə iştirakçısı olub. Qohumlarım arasında şəhidlik zirvəsinə ucalanlar da var. Yəni mən uşaqlıqda çox vaxt savaş görmüşəm.
Mən ehtiyatda olan gizirəm, tank komandiri olmuşam. Vətən müharibəsi başlayanda mən də könüllü olaraq cəbhəyə yollandım. Yaşım çatmasa da, tankçılarımıza çox ehtiyac olduğuna görə mənə etimad göstərdilər. Beləliklə, mən öz xidmətimi Beyləqan istiqamətindən başladım. Lakin müharibənin son günlərində Şuşada düşmənin atdığı mərmi nəticəsində yaralandım”.
Vaxtilə öz doğma yurd-yuvalarından didərgin düşən soydaşlarımızı unutmamalıyıq
Vətən müharibəsi əlili bildirib ki, o, Qubadlı, Füzuli rayonları, Hadrut qəsəbəsi, Şuşa şəhəri və Tuğ kəndi istiqamətlərində döyüşüb: “Lakin Topxana meşəsində mənim üçün ən yadda qalan yerdə videogörüntü çəkmişdim. Həmin videoda deyirdim ki, vaxtilə həmin meşədə o qışda, qarda, boranda Xocalıdan və Daşaltından didərgin düşən soydaşlarımızın olduğunu heç kəs unutmasın. Lakin İkinci Qarabağ savaşında həmin ərazilərə tankla qalxmaq mənim üçün ən böyük şərəf idi. Həmin vaxt göz yaşlarıma boğulmuşdum. Həm də torpaqlarımızı azad etdikdə geriyə dönüş yox idi, ancaq irəliyə doğru gedirdik. Verilən tapşırığa uyğun olaraq, 2020-ci il noyabrında Şuşaya daxil olan Azərbaycan Ordusunun tanklardan birini mən idarə edirdim. Şuşa sözünün yanındaydıq. O zaman dağları aşan, qayalardan dırmanan Xüsusi Təyinatlı Qüvvələrimiz artıq Şuşada idilər.
Biz verilən əmrləri layiqincə yerinə yetirdik. Prezident İlham Əliyev Ermənistan baş naziri Nikol Paşinyanı ağ bayraq qaldırmağa və kapitulyasiya aktını imzalamağa məcbur etdi. Həmin anadək biz bütün əmrləri layiqincə icra etdik.
Qeyd edək ki, R.Şirinov “Cəsur döyüşçü”, “Hərbi xidmətlərdə fərqlənməyə”, Qubadlının, Füzulinin, Şuşanın azad olunmasına görə medalları ilə təltif olunub. Həmçinin “Dəmir yumruq” milli mükafatına layiq görülüb.