Müxalifətçi Aleksey Navalnının ölümünün dəqiq səbəbini müəyyən etmək üçün məhkəmə-tibbi ekspertizanın rəyini gözləmək lazımdır.
Bu barədə Rusiya Prezidentinin mətbuat katibi Dmitri Peskov jurnalistlərə açıqlamasında bildirib.
O qeyd edib ki, Cəzaların İcrası Federal Xidməti (CİFX) Navalnının qəfil ölümünün səbəblərini araşdıracaq. Eyni zamanda, o, Navalnının ölümü barədə Prezident Vladimir Putinə məruzə olunduğunu da diqqətə çatdırıb. Qeyd edək ki, V.Putin hazırda Çelyabinskdə səfərdədir.
Dövlət Dumasının sədri Vyaçeslav Volodin Navalnının ölümündə Vaşinqton və Brüsseli günahlandırıb. O, teleqram kanalında yazıb ki, məhkəmə-tibbi ekspertizanın qərarını gözləmədən Qərbdən ard-arda ittihamlar səslənir.
Rusiyada bir çox ekspertlər hesab edirlər ki, Navalnının ölkədə prezident seçkiləri ərəfəsində ölməsi heç də hakimiyyətə sərf etmir. Onların bəziləri bu məsələdə Qərbin əli olduğunu düşünürlər.
CİFX Baş İdarəsi Navalnının öldüyü cəzaçəkmə müəssisəsinə xüsusi komissiya göndərəcək. Rusiya İstintaq Komitəsi də bu müəssisədə yoxlamalar aparacağını bəyan edib.
Qərb siyasətçiləri Navalnının ölümünə dərhal reaksiya veriblər. ABŞ Dövlət katibi Blinken, NATO-nun Baş katibi Stoltenberq, Almaniya kansleri Şolts, Fransa Prezidenti Makron və başqaları müxalifətçinin ölümündə Rusiya rəhbərliyini, ilk növbədə Putini təqsirləndiriblər.
İttihamlara cavab olaraq Rusiya XİN-in rəsmi nümayəndəsi Mariya Zaxarova bildirib ki, Qərb Navalnının ölümünə dərhal reaksiya verməklə özünü ifşa edir.
Rusiya hüquq-mühafizə orqanları müxalifət liderinin ölümü ilə bağlı icazəsiz aksiyalar keçiriləcəyindən narahatdırlar. Moskva Prokurorluğu şəhər sakinlərini icazəsiz etiraz aksiyaları keçirməkdən çəkindirib və belə tədbirlərin mümkün iştirakçılarına xəbərdarlıq edib.
Xatırladaq ki, Aleksey Navalnı 2022-ci ildə saxtakarlıq əməlinə görə 9 il müddətinə azadlıqdan məhrum edilmişdi. Ötən il isə ekstremist təşkilat yaratmaqda ittiham olunan müxalifətçiyə 19 il həbs cəzası verilmişdi.
Aleksey Navalnı fevralın 16-da Yamal-Nenets Muxtar Dairəsindəki təcridxanada vəfat edib. İlkin məlumata görə, müxalifətçi tromb qırılmasından dünyasını dəyişib.