Azərbaycan Cüdo Federasiyasının (ACF) baş katibi Rəşad Rəsullu suallari cavablandırıb. Həmin müsahibəni təqdim edirik.
- Bu il keçirilən beynəlxalq yarışlarda Azərbaycan cüdoçuları ümumilikdə 236 medal əldə etdilər. Başa çatmaqda olan ili necə dəyərləndirərdiniz?
- Hesab edirəm ki, ən yaxşı nəticələri məhz bu il əldə etdik. Məsələ təkcə medal sayında deyil. Bütün yaş qrupları üzrə cüdoçularımızda keyfiyyət dəyişikliyi görürük. Müəyyən problemlərimiz var idi. İdmançılarımız son iki ildə kifayət qədər ciddi irəliləyiş əldə ediblər. Amma daha yaxşı səviyyəyə çatmaq üçün bir qədər yol qət etməliyik. Buna baxmayaraq, idmançılarımızın inkişafı göz qabağındadır.
- Ötən ay Bakıda milli komandalar üçün Təlim-Məşq Mərkəzi istifadəyə verildi. Müxtəlif regionlardakı cüdo zallarında da təmir işləri aparılır. Sizcə, bütün bunlar Azərbaycanda cüdonun inkişafına necə təsir göstərəcək?
- Cüdo üzrə milli komandaların Təlim-Məşq Mərkəzinin istifadəyə verilməsi ölkəmizdə xüsusilə, elit cüdonun inkişafı baxımından mühüm əhəmiyyət kəsb edir. Fürsətdən istifadə edib, ölkə rəhbərliyinə, Prezident İlham Əliyevə bütün cüdo ailəsi adından təşəkkür edirəm. Bu il bir çox əlamətdar hadisələr olub. Federasiya olaraq, regionlarda təxminən 8-9 cüdo zalı təmir olunaraq istifadəyə verilib. 80-ə yaxın kluba beş minədək tatami paylanılıb. Bütün bunları nəzərə alsaq, 2023-cü ili cüdo üçün uğurlu hesab etmək olar.
- Azərbaycan millisinin üzvü Səid Mollayi son vaxtlar ona bəslənən ümidləri doğrulda bilmir. Təcrübəli idmançının hazırkı çıxışı federasiya rəhbərliyini və məşqçilər heyətini qane edirmi?
- Mən deməzdim ki, o, ümidləri doğrultmadı. Səid ötən ilin aprel ayında yığmamıza qoşulub. Bundan sonra o, iştirak etdiyi bir neçə yarışda qızıl medal qazandı. Ötən ilin oktyabrında dünya çempionatında beşinci yerin sahibi oldu. Həmin ilin dekabrında isə “Masters” yarışında fəxri kürsünün ikinci pilləsinə yüksəldi. O yarışdan sonra Səid Mollayi əməliyyat olundu. Dirsəyində onu narahat edən zədə var idi. Ona görə də idmançımızın ilin əvvəlində keçirəcəyi hazırlıqla bağlı müəyyən problemlər meydana gəldi. Təəssüf ki, mayda təşkil olunan dünya çempionatında Səidin çıxışını tam görə bilmədik. Daha sonra o, yenidən bir neçə zədə aldı. Hətta bu zədələrə görə Bakıda keçirilən Böyük Dəbilqə turnirini buraxmalı oldu. Bunun kimi bir neçə vacib və nüfuzlu yarışlarda iştirak edə bilmədi. Hətta Avropa çempionatında da güləşə bilmədi. Aldığı zədələrdən sonra Səid ilk dəfə Yaponiyanın paytaxtı Tokioda baş tutan Böyük Dəbilqədə yarışdı. Bu səbəbdən onun çıxışında müəyyən enişləri müşahidə etmək olar. Bütün bunlara baxmayaraq, Mollayinin komandada olması digər idmançılarımızın inkişafına müsbət təsir göstərir. Hazırda Olimpiya reytinqində 6-cı pillədə qərarlaşıb. 81 kiloqram çəki dərəcəsində digər idmançımız Zelim Kotsoyev isə doqquzuncudur. Onlar arasında güclü və sağlam rəqabət mövcuddur. Qarşıdakı yarışlarda onlardan hansının Olimpiya Oyunlarına lisenziya qazanacağını izləyib görəcəyik. Əminəm ki, cüdoçularımızın hər ikisi lisenziya əldə edəcək. Amma hansının seçiləcəyinə millinin məşqçilər heyəti və federasiya rəhbərliyi qərar verəcək. Biz Səidin zəif çıxışının obyektiv səbəblərə əsaslandığını bilirik. Bütün bunlar zədə ilə bağlıdır. Amma o, çox təcrübəli idmançıdır. Qısa zamanda toparlanıb lazım olan nəticəni göstərmə iqtidarına malikdir.
- Azərbaycan millisinin yeni məşqçisi Rüstəm Alimlinin həm əsas, həm də yeniyetmələr yığmasındakı fəaliyyətindən razısınız?
Ə Rüstəm Alimli yeniyetmə cüdoçulardan ibarət milli komandanın baş məşqçisidir. Onun necə işlədiyini mən yox, kişilərdən ibarət yığmanın baş məşqçisi Riçard Trautman müəyyən müddət keçdikdən sonra qiymətləndirə bilər.
- Hidayət Heydərov (73 kiloqram) bu il əla təsir bağışlayır. Yəqin ki, gələn il Fransanın paytaxtı Parisdə keçiriləcək Yay Olimpiya Oyunlarında ondan gözləntilər böyük olacaq?
- Hidayətin cari ilin ilk yarısındakı çıxışı ürəkaçan deyildi. Düzdür, dünya çempionatında beşinci yeri tutmuşdu. Bu, pis nəticə sayılmır. Amma onun özünə görə zəif nəticədir. Cüdoçumuzun potensialına bələdik. Bakı və Tokiodakı Böyük Dəbilqə turnirlərində, eləcə də Avropa çempionatında qızıl medal qazandı. Hazırda çox yaxşı formadadır. Biz ona güvənirik. Özündə də qələbəyə inam böyükdür. Hidayətin də qeyd etdiyi kimi, Paris Olimpiadasında ən yaxşı nəticə üçün əlindən gələni edəcək.
- Necə düşünürsünüz, Azərbaycan cüdo yığması Parisdən neçə medalla qayıda bilər?
- Onu proqnozlaşdırmaq çətin məsələdir. Buna görə də dəqiq bir şey deyə bilmərəm. Cüdoçuların Vətənə hansı nəticələrlə dönəcəklərini birlikdə izləyib görəcəyik.