Bu gün əsas vəzifə Qazaxıstanın Transxəzər beynəlxalq nəqliyyat marşrutunun (TBNM) inkişafı çərçivəsində beynəlxalq tranzit ölkəsinə çevrilməsidir.
Kazinform”a istinadla xəbər verir ki, bu barədə Qazaxıstan Respublikasının nəqliyyat naziri Marat Karabayev hökumətin iclasında bildirib.
Ötən il ilə müqayisədə bu dəhliz ilə daşımaların həcminin iki dəfə artaraq 2,5 milyon ton təşkil etdiyini, o cümlədən Qazaxıstan məhsulunun TBNM ilə ixracının üç dəfə artığını qeyd edən nazir əlavə edib ki, ixracla yanaşı, idxal yük axınının artması da müşahidə olunur.
“Bu, öz növbəsində, Avropa şirkətlərinin TBNM marşrutunda maraqlı olduqlarını göstərir. Eyni zamanda, Şərq-Qərb istiqamətində tranzit yükdaşımalarının həcmləri azalıb. Əsas səbəb – Cənub dəniz marşrutu ilə yükdaşıma dərəcəsinin azalmasıdır. Hazırda TBNM marşrutuna ixracın cəlb edilməsi, o cümlədən bu daşımalara dövlət dəstəyinin verilməsi məsələləri ilə bağlı qonşu ölkələrin səlahiyyətli orqanları və şirkətləri ilə danışıqlar aparılır”, - deyə Marat Karabayev bildirib.
Eyni zamanda, nazir əlavə edib ki, Qazaxıstan Respublikasının Prezidenti Kasım-Jomart Tokayev tərəfindən qarşıya Transxəzər beynəlxalq nəqliyyat marşrutu ilə daşımaların həcminin 5 dəfə artırılması vəzifəsi qoyulub: “Bu məqsədlə Azərbaycan, Gürcüstan və Türkiyə ilə müvafiq yol xəritəsi imzalanıb. Yol xəritəsinin reallaşdırılması çərçivəsində hər bir ölkə tərəfindən öz nəqliyyat infrastrukturunun sinxron inkişafı üzrə tədbirlər görülür. Qazaxıstan ixracatçıları “Maersk” (Danimarka – red.), “Cosco Shipping” (Çin), “PSA” (Sinqapur) kimi böyük beynəlxalq nəqliyyat-logistika şirkətləri ilə birgə növbəti 3-5 ilə potensial olaraq TBNM marşrutuna istiqamətlənmiş yük bazasının təhlilini aparır. Nəticədə, biz növbəti 5 ilə marşrutun yüklənməsinə dair tam mənzərəni görə biləcəyik”, - deyə Marat Karabayev sözlərini yekunlaşdırıb.