Bakı, 8 iyun.

Beynəlxalq Münasibətlərin Təhlili Mərkəzinin (BMTM) nümayəndə heyəti iyunun 7-8-də keçirilən Şanxay Əməkdaşlıq Təşkilatına (ŞƏT) üzv ölkələrin Beyin Mərkəzləri Forumunda geniş tərkibdə təmsil olunub. “Qlobal transformasiya dövründə Şanxay Əməkdaşlıq Təşkilatı: Çağırışlarla üz-üzə və irəliyə doğru” mövzusunda keçirilən forum Şanxay Siyasi Elmlər və Hüquq Universiteti (SHUPL), Çinin ŞƏT üzrə Beynəlxalq Mübadilə və Məhkəmə Əməkdaşlığı Milli İnstitutu, Çin Beynəlxalq Araşdırmalar İnstitutu və ŞƏT Araşdırmaları üzrə Çin Mərkəzi tərəfindən birgə təşkil edilib.
Forumun birinci günündə BMTM-in İdarə Heyətinin sədri Fərid Şəfiyev “ŞƏT-in inkişaf perspektivləri” mövzusunda plenar sessiyada geniş təqdimatla çıxış edib. O, ŞƏT-in çoxtərəfli əməkdaşlıq və diplomatiya üçün mühüm platforma olduğunu bildirərək təşkilatın genişlənməsi fonunda qərarqəbuletmə mexanizmlərinin təkmilləşdirilməsinin vacibliyini vurğulayıb. F.Şəfiyev qeyd edib ki, ŞƏT-ə üzvlük Azərbaycanın balanslaşdırılmış xarici siyasət kursuna uyğun olaraq ölkəyə mühüm iqtisadi, siyasi və strateji imkanlar vəd edir.

Forumun ikinci günündə BMTM və Şanxay Siyasi Elmlər və Hüquq Universitetinin (SHUPL) birgə təşkilatçılığı ilə “Çin və Cənubi Qafqaz: İpək Yolunun Birgə Dirçəldilməsi” mövzusunda paralel tədbir keçirilib. Çin ŞƏT Araşdırmaları Mərkəzinin təsisçi baş katibi Çen Yurunqun moderatorluğu ilə baş tutan tədbirdə BMTM, Şanxay Beynəlxalq Araşdırmalar İnstitutu, Şanxay Sosial Elmlər Akademiyası və Fudan Universitetinin nümayəndələri iştirak ediblər. Müzakirələr zamanı Cənubi Qafqazın Avrasiya məkanında nəqliyyat və ticarət əlaqələrinin genişləndirilməsində, eləcə də müasir İpək Yolunun inkişafında artan rolu ətrafında fikir mübadiləsi aparılıb.

Tədbirdə çıxış edən BMTM-in İdarə Heyətinin sədri Fərid Şəfiyev Azərbaycanın Mərkəzi Asiya, Cənubi Qafqaz və Avropanı birləşdirən strateji nəqliyyat və ticarət dəhlizlərinin mühüm qovşağı kimi mövqeyinin möhkəmləndiyini, həmçinin regional miqyasda orta güc statusuna doğru irəlilədiyini diqqətə çatdırıb. O, eyni zamanda, Azərbaycan və Mərkəzi Asiya ölkələrini birləşdirən C6 formatının praqmatik və nəticəyönümlü təşəbbüslər vasitəsilə beynəlxalq əhəmiyyətinin artdığını vurğulayıb.

Daha sonra çıxış edən BMTM ekspertləri Yunis Qurbanov, Roza Bayramlı, Vüsal Quliyev və Nurad Məmmədov Azərbaycanın milli maraqlara əsaslanan, tərəfdaşlıq və əməkdaşlığın təşviqinə yönəlmiş xarici siyasəti, Azərbaycan-Mərkəzi Asiya əməkdaşlığı, Azərbaycan-Çin yaşıl enerji tərəfdaşlığı, eləcə də infrastruktur layihələri və xalqlararası əlaqələrin inkişafının İpək Yolunun yenidən canlandırılmasındakı rolu ilə bağlı təqdimatlarla çıxış ediblər.

Qeyd edək ki, Forum çərçivəsində həm də son 25 ildə ŞƏT-in institusional inkişafı və əldə etdiyi nailiyyətlər, Mərkəzi Asiyanın təşkilat daxilindəki mövqeyi və əməkdaşlıq perspektivləri, eləcə də ŞƏT-in gələcək inkişaf istiqamətləri və strateji baxışı əsas müzakirə mövzuları sırasında olub.