Ermənistan ilk gündən Avropa İttifaqının mülki missiyasına təhlükəsizlik çətiri kimi yanaşıb. Missiyanın ziddiyyətli davranışları, Ermənistanın törətdiyi təxribatlar bunu bir daha sübut edir. Ötən gün Azərbaycan sərhədçisinin snayperlə vurulması bu siyasətin tərkib hissəsidir.
Bu fikirləri Milli Məclisin deputatı Könül Nurullayeva söyləyib.
Deputat bildirib ki, bir müddət əvvəl Azərbaycan Prezidenti bölgədə sakitliyin olduğunu bildirmişdi və təbii, bu vəziyyət sülhlə bağlı ümidləri artırırdı. Amma Ermənistanın havadarlarının diktəsi ilə bu sakitlik növbəti dəfə pozuldu. Hadisənin Ermənistan silahlı qüvvələri tərəfindən qəsdən və məqsədyönlü şəkildə törədildiyi, vəziyyətin gərginləşməsinə çalışıldığı aydın görünür. Ermənistan Aİ missiyasının çətiri altında gizlənərək öz çirkin niyyətlərini reallaşdırmağa çalışır.
Onun sözlərinə görə, rəsmi Bakı “mülki missiya”nın genişləndirilməsinin, Ermənistanın Hindistandan Fransa lisenziyası ilə istehsal olunmuş silahlar almasının, Parisin İrəvanı silahlandırmasının regionda vəziyyətin gərginləşməsinə xidmət etdiyini dəfələrlə bildirib. Fransa generalının Ermənistana səfəri, Azərbaycanla sərhəddə peyda olması da, əslində, hərbi əməliyyatlara hazırlıq kimi şərh olunmuşdu. Bunun davamı olaraq törədilən son insident - sərhəddəki mövqelərə snayperin yerləşdirilməsi təbii ki, planlaşdırılmış haldır.
“Aİ missiyasının mütəmadi olaraq şərti sərhədə yaxınlaşıb selfi çəkdirərək, binoklla qarşı tərəfə baxması Azərbaycana təzyiq məqsədi güdürdü. 2022-ci il oktyabrın 6-da bölgəyə gələn missiya, əslində, normallaşma prosesinə kömək göstərməli idi. Amma təəssüf ki, bunun əksi baş verir və monitorinq missiyasının fəaliyyəti Praqada əldə olunmuş razılaşmalarla ciddi ziddiyyət təşkil edir. Halbuki razılaşmaya əsasən bu missiyanın mövcudluğu Ermənistanın üzərinə götürdüyü öhdəlikləri yerinə yetirməkdən boyun qaçırması üçün bəhanəyə çevrilməməli idi”, - deyə K.Nurullayeva qeyd edib.
Deputat diqqətə çatdırıb ki, missiya Azərbaycanın legitim maraqlarını nəzərə almalı, Aİ tərəfindən bu missiyanın fəaliyyətinin qarşılıqlı inam və etimadı sarsıtmayacaq şəkildə həyata keçirilməsi təmin etməlidir. Ona görə də rəsmi Bakı bir daha xəbərdarlıq edir - Azərbaycan tərəfi Aİ missiyasının fəaliyyətə başlaması ilə bağlı müzakirələr prosesində keçmiş təcrübədən irəli gələn lazımi dərslərin çıxarılmasına maksimum diqqət yetirilməsini gözləyir. Regionda törədilən hər hansı təxribatın məsuliyyəti Ermənistan rəhbərliyinin üzərinə düşür.