Son günlər Ermənistanın baş naziri Nikol Paşinyanın Kollektiv Təhlükəsizlik Müqaviləsi Təşkilatından (KTMT) çıxmaq haqqında bəyanatları və bu təşkilatı tənqid etməsi Qərb dövlətlərindən külli miqdarda pul qoparmaq üçün həyata keçirdiyi siyasi oyundur.
Bu sözləri Avrasiya Tədqiqatlar Mərkəzinin rəhbəri, Belarusun tanınmış politoloqu Dmitri Belyakov deyib.
O bildirib ki, N. Paşinyana onu hakimiyyətə gətirən siyasi qruplarla hesablaşmaq üçün pul lazımdır. Əks təqdirdə, onlar birləşərək N. Paşinyanı devirə bilərlər. Ermənistan iqtisadiyyatının zəif olması isə baş nazirə külli miqdarda pul əldə etmək imkanı vermir.
D. Belyakov qeyd edib ki, Ermənistanın baş naziri KTMT-dən çıxmaq haqqında bəyanatlardan və tənqiddən başqa heç bir real addım atmayacaq. İrəvanda bunun nəticələrinin ağır olacağını çox yaxşı başa düşürlər.
O diqqətə çatdırıb ki, N.Paşinyanın 2020-ci ildə Azərbaycanın həyata keçirdiyi hərbi əməliyyatlar zamanı KTMT-nin Ermənistana yardım göstərmədiyini tənqid edərək iradını bildirməsi tamamilə yersizdir. Çünki Azərbaycan hərbi əməliyyatları öz ərazisində aparıb və bu əməliyyatlara müdaxilə etmək üzv dövlətlər arasında imzalanan müqaviləyə zidd olardı. “KTMT Ermənistana heç bir kömək göstərə bilməzdi, çünki Azərbaycan hərbi əməliyyatları öz sərhədləri çərçivəsində həyata keçirirdi”, - deyən politoloq əlavə edib ki, təşkilatın sənədlərində bu məsələ öz əksini aydın şəkildə tapıb.
Fransanın Ermənistana silah-sursat verməsinə toxunan D. Belyakov vurğulayıb ki, bu siyasət Rusiyaya qarşı yönəlib. Fransa bölgədə qeyri-sabit vəziyyət yaradıb oraya müdaxilə etmək və Rusiyaya qarşı yeni meydan yaratmağa cəhd göstərir.