Səudiyyə Ərəbistanının ingilis dilində nəşr olunan “Arab News” nəşri oxucularına Azərbaycan Prezidenti İlham Əliyevin iyulun 20-də “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumunun açılış mərasimində çıxışı zamanı Fransanın müstəmləkəçi siyasəti haqqında səsləndirdiyi fikirləri təqdim edib.
Məqalədə Azərbaycan və Fransa münasibətləri təhlil olunub. Qeyd edilib ki, Azərbaycan Prezidenti İlham Əliyev çıxışında Qoşulmama Hərəkatının bir çox üzvünün keçmişdə müstəmləkəçiliyin qurbanı olduğunu bildirib. O əlavə edib ki, milyonlarla insan bu siyasətdən əziyyət çəkib və bəzi xalqlar indi də bu zülmün altındadır.
Məqalədə diqqətə çatdırılıb ki, Prezident İlham Əliyev Azərbaycanın bu xalqlara keçmişin iyrənc qalığından azad olmaları üçün kömək etmək istədiyini deyib. Dövlət başçısının sözlərinə görə, bu ölkələr Fransadan minlərlə kilometr uzaqda yerləşir, onları assimilyasiya etməyə çalışırlar, təhqir edirlər. Yeni Kaledoniyada son hadisələr zamanı yeddi insan həlak olub. Bu, Fransanın və onun prezidentinin əməli nəticəsində baş verib. “Biz kolonializmdən əziyyət çəkən bütün xalqları dəstəkləməyə davam edəcəyik, əlimizdən gələni edəcəyik”, -deyə Azərbaycanın lideri vurğulayıb.
“Arab News” diqqətə çatdırıb ki, bu həftənin əvvəlində Bakıda Yeni Kaledoniya və Fransanın digər ərazilərindən, o cümlədən Korsika, Karib dənizi və Sakit okean adalarından müstəqillik tərəfdarı olan qrupların iştirak etdiyi konqres keçirilib. Tədbir iştirakçıları Fransa hakimiyyətini kəskin tənqid edib və Azərbaycan nümayəndə heyəti Yeni Kaledoniyaya səfərə dəvət olunub.
Məqalənin sonunda qeyd edilib: “Azərbaycan hakimiyyəti Fransanı otuz illik Qarabağ münaqişəsinə son qoymaq üçün sülh sazişinə nail olmaq səylərində destruktiv mövqe tutmaqda və İrəvan hakimiyyəti ilə müdafiə müqavilələri imzalamaqla Ermənistanın xeyrinə qərəzli olmaqda ittiham edir”.