Bakı, 7 May.

Ədliyyə Nazirliyinin Dövlət İmtahan Mərkəzi ilə birlikdə ədliyyə orqanlarına qulluğa qəbulla bağlı keçirdiyi test imtahanı başa çatıb.
“Ədliyyə orqanlarında qulluq keçmə haqqında” Qanunla müəyyən edilmiş tələblərə cavab verən namizədlər müsabiqənin ikinci mərhələsinə buraxılacaq və onlarla fərdi qaydada söhbət aparılacaq. Söhbətin keçirilmə vaxtı və yeri barədə namizədlərə əvvəlcədən məlumat veriləcək.

Bu gün Ədliyyə Nazirliyi Dövlət İmtahan Mərkəzi ilə birlikdə ədliyyə orqanlarına qulluğa qəbulla bağlı test imtahanı keçirir.

Bu barədə jurnalistlərə nazirliyin mətbuat xidmətinin rəhbəri Ləman Hüseynzadə məlumat verib.

Ləman Hüseynzadə qeyd edib ki, üç saat davam edəcək imtahanda namizədlərə 80 sual qanunvericilik və 20 sual məntiqi təfəkkür üzrə olmaqla, ümumilikdə 100 sual təqdim edilib: "Qanunvericilik üzrə hər sual 1 balla, məntiqi təfəkkür üzrə hər sual 0,5 balla qiymətləndirilir, imtahandan keçid balı isə 55-dir. İmtahanda 119 namizəd iştirak edir. Namizədlər test imtahanını yekunlaşdırdıqda topladıqları bal barədə məlumatla tanış olmaq imkanına malikdirlər".

Qeyd edək ki, uğur qazanmış namizədlər müsabiqənin söhbət mərhələsində iştirak etmək üçün qanunvericilikdə nəzərdə tutulmuş sənədlərini 15 iş günü ərzində saat 9:00-dan 18:00-dək Ədliyyə Nazirliyinin İnsan resursları idarəsinə təqdim etməlidirlər.

Namizədlərin təqdim etməli olduqları sənədlərin siyahısı ilə nazirliyin rəsmi veb-saytına keçid edərək tanış olmaq mümkündür.

Təqdim etdikləri sənədlərə görə “Ədliyyə orqanlarında qulluq keçmə haqqında” Qanunla müəyyən edilmiş tələblərə cavab verən namizədlər müsabiqənin ikinci mərhələsinə buraxılacaq və onlarla fərdi qaydada söhbət aparılacaq. Söhbətin keçirilmə vaxtı və yeri barədə namizədlərə əvvəlcədən məlumat veriləcək.