Azərbaycan jurnalistləri Özbəkistanın media mühiti ilə tanış olublar
Azərbaycan media nümayəndələrinin Özbəkistana təşkil olunan press-turu çərçivəsində avqustun 18-də Özbəkistan Respublikası Prezident Administrasiyasının yanında Kütləvi İnformasiya Vasitələri üçün Kontent Hazırlama Mərkəzinə səfər təşkil olunub.
Press-turda Azərbaycanın aparıcı media qurumlarının 20 nümayəndəsi iştirak edir.
Səfər zamanı azərbaycanlı jurnalistlər media, sosial şəbəkələr və rəqəmsal platformalar üçün kontent hazırlanması, media sahəsinin inkişafı, media nümayəndələrinin peşəkar ixtisasının artırılması və Özbəkistanın beynəlxalq imicinin təbliği istiqamətində həyata keçirilən dövlət layihələri və o cümlədən Mərkəzin fəaliyyəti ilə tanış olublar.
Press-tur iştirakçılarına Mərkəz tərəfindən həyata keçirilən layihə və təşəbbüslər barədə məlumat verilib. Xüsusilə Media Start, Debyut və Fikrlab layihələrinin, “Aura.uz” platformasının, habelə mobil jurnalistika, SMM və müasir rəqəmsal kommunikasiyalar üzrə təhsil proqramlarının təqdimatı keçirilib.
Mərkəzin aparıcı xarici tərəfdaşlarla birgə həyata keçirdiyi beynəlxalq layihələrə xüsusi diqqət yetirilib.
Səfər çərçivəsində Azərbaycan media nümayəndələrinin Özbəkistanın aparıcı media qurumlarının rəhbərləri ilə görüşü də keçirilib.
Kontent Hazırlama Mərkəzinin direktor müavini Cahangir Abduraxmonov Mərkəzin yaradılması və fəaliyyəti barədə məlumat verərək bildirib ki, bu dövlət qurumu 2025-ci ilin iyulunda Prezident Administrasiyasının mətbuat xidmətinin media mərkəzinin bazasında yaradılıb. Təşkilat Media ilə işləmək üçün materialların hazırlanması və əlaqələndirilməsi ilə məşğul olur.
Cahangir Abduraxmonov bildirib ki, 2027-ci il fevralın 4-5-də Daşkənddə “Uzexpocentre” Milli Sərgi Şirkətində 50-dən çox ölkədən kino, televiziya, animasiya və rəqəmsal media nümayəndələrini bir araya gətirəcək ilk böyük beynəlxalq kontent bazarı – “Tashkent Content Market 2027” keçiriləcək.
Görüşdə iki ölkənin media orqanları arasında əməkdaşlığın genişləndirilməsi, birgə media layihələrinin həyata keçirilməsi, peşəkar təcrübə mübadiləsi, habelə birgə informasiya kontentinin hazırlanması perspektivləri müzakirə olunub. Daha sonra C.Abduraxmonov Azərbaycan nümayəndələrini “Tashkent Content Market 2027”də iştirak etməyə dəvət edib.
Azərbaycan media nümayəndələrinin Özbəkistana press-turu davam edir. Səfər çərçivəsində jurnalistlər ölkənin sosial-iqtisadi və mədəni inkişafının müxtəlif istiqamətləri ilə tanış olacaqlar.
