Hüquqi şəxslərin cinayət məsuliyyətinin hədləri genişləndirilir
Hüquqi şəxslərin cinayət məsuliyyətinin hədləri genişləndirilir. Cinayət Məcəlləsinin "Məhkəmənin hökmünü, qərarını, yaxud digər aktını icra etməmə" adlı 306-cı maddəsində nəzərdə tutulmuş əmələ görə də cinayət məsuliyyətinin müəyyən edilməsi təklif edilir.
Bu, parlamentin Hüquq siyasəti və dövlət quruculuğu komitəsinin oktyabrın 5-də keçirilən iclasının gündəliyinə daxil edilmiş Cinayət Məcəlləsində dəyişiklik edilməsi haqqında qanun layihəsində əksini tapıb.
Bildirilib ki, hüquqi şəxslər barəsində tətbiq olunan cinayət-hüquqi tədbirlər Cinayət Məcəlləsində nisbətən yeni institutdur. İlk dəfə 7 mart 2012-ci il tarixli, 314-IVQD nömrəli Qanun ilə hüquqi şəxslərin cinayət məsuliyyəti məcəlləyə gətirilib, 2018-ci ildən Cinayət-Prosessual Məcəlləsində dəyişikliklər edilməsi haqqında və Cəzaların İcrası Məcəllədə dəyişiklik edilməsi haqqında qanunlarla eyni anda tətbiq olunmağa başlanıb. Zaman-zaman həmin münasibətləri tənzimləyən normalara müəyyən dəyişikliklər edilib. Dəyişikliklər əsas etibarilə Cinayət Məcəlləsinin Xüsusi hissəsində nəzərdə tutulan hansı cinayət əməllərinə görə hüquqi şəxslərə cinayət-hüquqi tədbirlərin tətbiq olunması ilə bağlı olub.
Hazırkı qanun layihəsində hüquqi şəxslərin cinayət məsuliyyətinin hədləri genişləndirilərək Cinayət Məcəlləsinin "Məhkəmənin hökmünü, qərarını, yaxud digər aktını icra etməmə" adlı 306-cı maddəsində nəzərdə tutulmuş əmələ görə də cinayət məsuliyyətinin müəyyən edilməsi təklif edilir. Hüquqi şəxslərin hüquq münasibətlərinin iştirakçıları kimi aktivliklərinin artması, çoxsaylı məhkəmə aktları ilə hüquqi şəxslərin üzərinə öhdəliklərin qoyulması və məhkəmə aktlarının icrasının önəmi bu dəyişiklikləri zəruri edir.
