Fevralın 7-də növbədənkənar Azərbaycan Respublikası Prezidentinin seçkilərində seçicilərin yüksək fəallığı müşahidə olunur. Seçicilər seçki məntəqələrinə gələrək şəffaf, ədalətli və demokratik qaydada səs verirlər.
Səsvermədə iştirak edən Bakı Mühəndislik Universitetinin Biznesin idarə edilməsi fakültəsinin müəllimi Şamxal Həşimov açıqlamasında bu seçkilərin böyük siyasi əhəmiyyət daşıdığını vurğulayaraq deyib: “Müstəqilliyin bərpasından sonra ilk dəfə olaraq seçkilər Azərbaycanın bütün suveren ərazisini əhatə edir. Ona görə də bu seçkilərdə iştirak hər bir azərbaycanlı üçün qürurverici və şərəflidir. Daha bir mühüm məqam odur ki, bu seçkilər müstəqil Azərbaycanın həyatında tamamilə yeni mərhələnin başlanğıcı olacaq. Bu baxımdan seçkilərdə iştirak xüsusi əhəmiyyət kəsb edir. 7 fevral - növbədənkənar prezident seçkiləri Azərbaycanın qarşıdakı illərdə daha böyük uğurlara çatması yolunda mühüm dönüş nöqtəsi olacaq”.
Məhz bu baxımdan builki seçkilərə marağın daha böyük olduğunu qeyd edən Ş.Həşimov vətəndaşların səsvermədə fəal iştirak etdiklərini bildirib. O, səs verdiyi 17 saylı Yasamal ikinci seçki dairəsinin 2 saylı seçki məntəqəsində də yüksək seçici fəallığını müşahidə etdiyini diqqətə çatdırıb.