“Yaxın tarixə diqqət yetirsək, görərik ki, dövlət müstəqilliyi bərpa edildikdən sonra ölkəmizin inkişaf strategiyası möhkəm təməllər üzərində qurularaq, bazar iqtisadiyyatına sürətli keçid baş verib. Müasir Azərbaycanın qurucusu Ulu Öndər Heydər Əliyevin də vurğuladığı kimi, “Azərbaycan dövlətinin strateji yolu yalnız demokratiya, sərbəst iqtisadiyyat prinsiplərinin bərqərar olması, bazar iqtisadiyyatı və sahibkarlığın inkişafıdır”. Bu düşünülmüş siyasət nəticəsində ölkəmizdə makroiqtisadi sabitlik və dinamik iqtisadi inkişaf üçün əsaslı zəmin yaradılıb. Nəticədə özəl sektorun, eləcə də ölkənin sosial-iqtisadi inkişafında önəmli rol oynayan geniş sahibkarlar təbəqəsi formalaşıb. Ölkə iqtisadiyyatının qlobal iqtisadi sistemə inteqrasiyasında mühüm nailiyyətlər əldə olunub.
Bu siyasət sonrakı illərdə Prezident İlham Əliyev tərəfindən uğurla davam etdirilərək, iqtisadiyyatın inkişafı üzrə uzunmüddətli strategiya və dövlət proqramları qəbul olunub”.
Bunu Ali Məhkəmənin və Məhkəmə-Hüquq Şurasının sədri İnam Kərimov “Azərbaycan Arbitraj Günləri” tədbirində çıxışı zamanı deyib.
“Sahibkarlıq iqtisadi inkişafın təməl daşı kimi dayanıqlı iqtisadi sistemin qurulmasına və iqtisadi tərəqqiyə təkan verməklə yanaşı, həm də sosial rifahın yüksəldilməsində mühüm rol oynayır. Ona görə də bu fəaliyyətin dəstəklənməsi və sahibkarlığın inkişafı dövlətimizin hər zaman əsas hədəflərindən biridir.
Bildiyiniz kimi, bazar iqtisadiyyatında dayanıqlı iqtisadi inkişaf davamlı investisiya yatırımları tələb edir. İş adamları isə siyasi stabil, sərmayələrinin yüksək səviyyədə qorunduğu və möhkəm hüquqi müdafiəsi olan ölkələrə yatırımlar etməkdə maraqlıdırlar. Çünki investisiyanın qorunmasında müstəqil, güclü və ədalətli məhkəmə sistemi tələb olunur. Beynəlxalq təcrübə göstərir ki, müstəqil məhkəmə sistemi həmçinin ölkədə kiçik və orta sahibkarlığın sürətli inkişafı və böyük bizneslərin formalaşmasında önəmli rola malikdir. Buna görə də Azərbaycanda məhkəmə-hüquq islahatları hər zaman dövlətin diqqət mərkəzində olub. 2019-cu ildə Azərbaycan Respublikası Prezidentinin “Məhkəmə-hüquq sistemində islahatların dərinləşdirilməsi haqqında” Fərmanı ilə ölkəmizdə məhkəmə-hüquq sistemində böyükhəcmli islahatlar başlayıb. Bu çərçivədə ölkənin müxtəlif regionlarında ixtisaslaşdırılmış inzibati və kommersiya məhkəmələri yaradılıb. Hazırda inzibati məhkəmələr müstəsna olaraq inzibati mübahisələrə, kommersiya məhkəmələri isə sahibkarlıq fəaliyyəti ilə bağlı kommersiya mübahisələrinə baxır. Həmin islahatlar məhkəmə strukturunda ixtisaslaşmanın və optimallaşdırılmanın artırılmasına və iş yükünün daha balanslı bölüşdürülməsinə yol açıb.
Bununla yanaşı, kommersiya məhkəmələrinin yaradılması sahibkarlıq fəaliyyəti ilə bağlı mübahisələrin həllində hüquqi müəyyənliyin təmin edilməsi, sahibkarların hüquqlarının müdafiəsinin gücləndirilməsi və nəticədə ölkəmizdə biznes və investisiya iqliminin daha da yaxşılaşdırılması istiqamətində önəmli mərhələ olub”, - deyə İ.Kərimov qeyd edib.