Bakı Slavyan Universitetinin məzun günü keçirilib
BSU-dan bildirilib ki, tədbirdə bir sıra rəsmilər, universitetin professor-müəllim heyəti, tərəfdaş qurumların nümayəndələri iştirak edib, məzunların sevincinə şərik olublar.
Əvvəlcə Azərbaycan Respublikasının Dövlət Himni səsləndirilib, Ulu Öndər Heydər Əliyevin və ölkəmizin ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Məzun Günü tədbirini açıq elan edən İctimai Televiziya və Radio Yayımları Şirkətinin aparıcısı, BSU-nun məzunu Jalə Həsənli universitetin yaranma tarixi, keçdiyi inkişaf yolu, son illərdə qazandığı ciddi uğurlar, beynəlxalq əlaqələrinin genişləndirilməsi barədə ətraflı məlumat verib.
BSU-nun rektoru Anar Nağıyev məzunları təbrik edib, onlara gələcək həyatlarında nailiyyətlər arzulayıb, eyni zamanda, məzunların müasir əmək bazarında layiqli yer tutacaqlarına, qazandıqları bilik və bacarıqları reallaşdırmaq üçün geniş imkanlar əldə edəcəklərinə əminliyini ifadə edib. Qeyd edib ki, Prezident İlham Əliyevin müvafiq Sərəncamı ilə yaradılmış Qarabağ Universiteti qlobal nümunəli universitet kimi formalaşdırılması hədəflənir. Birinci vitse-prezident Mehriban xanım Əliyevanın təhsil sahəsinə göstərdiyi xüsusi diqqət və qayğı nəticəsində mühüm islahatlar həyata keçirilir, ali təhsil sisteminə əlçatanlığın təmin olunması istiqamətində ciddi addımlar atılır, təhsildə inklüzivlik əsas prioritetlər sırasında tətbiq edilir.
Son 4 ilin ölkəmizin tarixində misli görünməmiş hadisələrlə yadda qalmasından danışan rektor Müzəffər Ali Baş Komandan İlham Əliyevin rəhbərliyi ilə xalqımızın düşmən üzərində Zəfər qazanmasını, ölkəmizin ərazi bütövlüyünün bərpa edilməsini və dövlət suverenliyimizin respublikamızın bütün ərazisində bərqərar olduğunu diqqətə çatdırıb.
Rektor qeyd edib ki, bütün şəhidlərimiz kimi, BSU-nun Vətən müharibəsində şəhid olmuş məzunları Nicat Şükürlünün, Kənan Rüstəmlinin, Elnur Allahverdizadənin, antiterror əməliyyatlarının şəhidi Cavid Mirzəyevin qəhrəmanlıq tarixçələri dərin hörmət və ehtiramla yaddaşımıza yazıldı.
A.Nağıyev vurğulayıb ki, ölkəmizin inkişafı və Zəfər tarixi, Qarabağ və Zəngəzurun dünyanın ən inkişaf etmiş zonalarından birinə çevrilməsinə hədəflənmiş dövlət siyasəti, burada yaradılan yaşıl zonalar, Azərbaycanın qlobal səviyyədə üzərinə götürdüyü missiyaları universitetimizin də müvafiq qaydada yeni dövrün tələblərinə transformasiyanı tələb edir. Yeni dövrün mütəxəssislərinin hazırlanması hər birimizin üzərinə səriştə əsaslı, yüksək kvalifikasiyalı kadrların hazırlanması üçün təhsil proqramlarının məzmun inkişafını əsas hədəflərdən biri kimi qarşımıza qoyur. Eyni zamanda, universitetin beynəlxalq əlaqələrinin gücləndirilməsi, mobillik proqramlarında iştirak payımızın artırılması, beynəlxalq reytinqlərdə iştirak əsas hədəflərimizdəndir.
Diqqətə çatdırıb ki, artıq bu istiqamətdə addımlar atılıb, “Erasmus” layihəsi, eləcə də ikitərəfli layihələr əsasında ötən tədris ilində tələbə və müəllimlərimizin tərəfdaş universitetlərdə mübadilələri baş tutub, universitetimizin beynəlxalq reytinq sıralamalarında iştirakı üçün zəruri işlər gerçəkləşib, konfranslarımızın beynəlxalq tələblərə uyğun keçirilməsi təmin edilib.
Rektor bildirib ki, dövlətimizin başçısı İlham Əliyevin müvafiq Sərəncamı ilə Azərbaycanda 2024-cü il "Yaşıl dünya naminə həmrəylik ili " elan edilib. Cari ilin noyabr ayında iqlim dəyişikliyi üzrə dünyanın ən böyük tədbiri - COP 29 konfransı Bakıda keçiriləcək. Bu istiqamətdə BSU-da da müxtəlif tədbirlər həyata keçirilir və hər birimizin ölkəmizin bu sürətli inkişafında yer alacaq yüksəkixtisaslı kadrların hazırlanması işində üzərimizə böyük məsuliyyət düşür.
BSU-nun fəaliyyət istiqamətləri və əsas missiyası barədə geniş məlumat verən rektor qeyd edib ki, universitetin əsas missiyası milli şüura malik, fundamental biliklərə yiyələnmiş rəqabətqabiliyyətli, səriştəli, məsuliyyətli, öz peşəsini dərindən bilən, dünya standartları səviyyəsində səmərəli fəaliyyət göstərməyə, ixtisası üzrə peşə hazırlığı səviyyəsini daim artırmağa qadir olan, yaradıcı və innovativ, yüksəkixtisaslı mütəxəssislər hazırlamaqdan ibarətdir.
Universitetin son illərdəki fəaliyyəti barədə rəqəmlər və müqayisəli təhlili əsasında danışan rektor deyib ki, 2023-2024-cü ildə 1350 nəfərdən çox tələbə qəbulu olub. Qarşıdan gələn 2024-2025-ci tədris ilindən bu rəqəmin daha da artması planlaşdırılır. Universitetimizin tarixində ilk dəfə olaraq ali təhsilin hər üç səviyyəsi üzrə ümumi təhsilalanların sayı 5000 nəfəri ötüb
A.Nağıyev məzunlara BSU-nu bir dəyər kimi daim yüksək tutmağı, yiyələndikləri peşədən asılı olmayaraq, dövlətimizin müstəqilliyini, xalqımıza məxsus nəcib dəyərləri qorumağı, doğma Azərbaycanımızın daha da inkişaf etməsi və güclənməsi üçün əzmlə, ləyaqətlə, fədakarlıqla çalışmağı tövsiyə edib və onlara bu vacib, şərəfli, müqəddəs yolda uğurlar diləyib.
Mədəniyyət nazirinin müavini Səadət Yusifova, Milli Məclisin deputatı Soltan Məmmədov çıxış edərək məzunları təbrik edib, onlara Vətənimizə layiqincə xidmət etməyi, milli-mənəvi dəyərlərə sadiq qalmağı və həmişə xalqımızın adını uca tutmağı arzulayıblar.
BSU-nun 2024-cü il magistr məzunu Nuray Babayeva universitetin məzunu olmaqdan qürur duyduğunu ifadə edib, eyni zamanda universitetin rəhbərliyinə və müəllimlərə tələbələrə göstərilən yüksək diqqət və qayğıya görə təşəkkür edib.
Sonra BSU-nun 2024-cü il üzrə ən yüksək akademik göstəricilərinə görə fərqlənən məzun tələbə və magistrantlarına təşəkkürnamələr təqdim edilib.
Tədbir konsert proqramı ilə davam edib.
