Bakı, 25 sentyabr.

“Zəngəzur” pilotsuz uçuş aparatı (PUA) relyefin mürəkkəb olduğu və ənənəvi üsullarla çətin keçilən ərazilərdə radiasiya monitorinqi aparmaq məqsədilə hazırlanıb.

Bu barədə PUA-nın hazırlanmasında iştirak etmiş Bakı Mühəndislik Universitetinin tələbəsi Nadir Daşdıyev “ADEX-2024” 5-ci Yubiley Azərbaycan Beynəlxalq Müdafiə Sərgisi zamanı məlumat verib.

O deyib ki, “Zəngəzur” PUA-sının əsas xüsusiyyəti, dağlıq, meşəlik və çətin keçilən ərazilərdə effektiv işləyə bilməsidir: “Beləliklə, Qarabağda minalardan təmizlənmiş ərazilərdə radiasiya monitorinqi daha səmərəli və təhlükəsiz şəkildə həyata keçirilə bilər. “Zəngəzur” PUA-sı tamamilə yerli istehsaldır və layihə çərçivəsində 13 ay ərzində hazırlanıb. Bu müddətdə komandamız həm PUA-nı, həm də onun yer stansiyasını müstəqil şəkildə hazırlayıb, xarici texnologiyalardan asılılığı azaltmaq məqsədilə öz həll yollarını tətbiq edib. Layihənin digər mühüm tərəfi, onun yüksək manevr qabiliyyətinə malik olması və çətin relyeflərə uyğunlaşmasıdır. Layihədə altı nəfərdən ibarət komanda və mentor da iştirak edib”.


“Biz çətin keçilən ərazilərdə effektiv işləyə bilən aparat yaratmışıq. Araşdırma müddəti 10 ay çəkib və bu müddətdə qarşıya çıxan nöqsanlar həll edilib. Təklif edilən bu innovativ həll, digər mühüm nailiyyətlər kimi, qeyd edilməyə layiqdir. Bu texnologiyanın daha da təkmilləşdirilməsi üçün işlər davam etdirilir”, - deyə komandanın kapitanı Nadir Daşdıyev əlavə edib.

Hazırda “Zəngəzur” PUA-sı “ADEX-2024”də nümayiş etdirilir.