Bakı, 14 iyul.

Milli Məclisin iyulun 14-də keçirilən plenar iclasında "Tibbi sığorta haqqında" və "Əlilliyi olan şəxslərin hüquqları haqqında" Azərbaycan Respublikasının qanunlarında dəyişiklik edilməsi barədə qanun layihəsini üçüncü oxunuşda müzakirəyə çıxarıb.

Qanun layihəsi icbari tibbi sığorta sahəsində hüquqi tənzimləmənin təkmilləşdirilməsi, elektron informasiya sistemindən istifadənin hüquqi əsaslarının dəqiqləşdirilməsi və əlaqəli qanunvericilik aktlarının uyğunlaşdırılması məqsədilə hazırlanıb.

Layihəyə əsasən, "Tibbi sığorta haqqında" Qanuna "icbari tibbi sığorta fondu" anlayışı əlavə edilir. Yeni müddəaya görə, icbari tibbi sığorta fondu dövlətin mülkiyyətində olan, müvafiq icra hakimiyyəti orqanının müəyyən etdiyi qurum tərəfindən idarə olunan, dövlət büdcəsindən kənar müstəqil büdcəyə malik məqsədli dövlət maliyyə fondu kimi müəyyən edilir.

Bununla yanaşı, qanunda icbari tibbi sığortanın tətbiqi ilə bağlı əməliyyatların elektron qaydada həyata keçirilməsinə dair müddəalar yenilənir. Dəyişikliklərə əsasən, bu əməliyyatlar müvafiq icra hakimiyyəti orqanının müəyyən etdiyi qurumun informasiya sistemi vasitəsilə elektron qaydada həyata keçiriləcək.

Qanun layihəsində, həmçinin "Əlilliyi olan şəxslərin hüquqları haqqında" Qanunun 1.0.17-ci maddəsinə dəyişiklik edilir. Dəyişikliyə əsasən, həmin maddədən "və reabilitasiya imkanlarının" sözləri çıxarılır.

Qeyd olunub ki, dəyişikliklər icbari tibbi sığorta sisteminin fəaliyyətinin daha səmərəli təşkilinə, elektron idarəetmə mexanizmlərinin təkmilləşdirilməsinə və qanunvericilikdə terminoloji dəqiqliyin təmininə xidmət edir.

Müzakirələrdən sonra qanun layihəsi səsverməyə çıxarılaraq üçüncü oxunuşda qəbul olunub.