Bakı, 25 sentyabr.
Sentyabrın 25-də “ADEX-2024” və “Securex Caspian” sərgiləri çərçivəsində Azərbaycan Respublikasının müdafiə sənayesi naziri Vüqar Mustafayev Pakistanın müdafiə istehsalatı nazirinin müavini Muhammad Çiraq Haiderin, Serbiyanın müdafiə nazirinin köməkçisi Nenad Miloradoviçin başçılıq etdiyi nümayəndə heyətləri, Rusiyanın Hərbi-Texniki Əməkdaşlıq Federal Xidmətinin direktoru Dmitriy Şuqayev, “Rosoboroneksport” şirkətinin baş direktoru Aleksandr Mixeyev, həmçinin Çinin “CPM İEC” şirkətinin rəhbər şəxsləri ilə görüşüb.
Müdafiə Sənayesi Nazirliyindən bildirilib ki, görüşlərdə bu ölkələrlə Azərbaycan arasında hərbi-texniki sahədə mövcud əlaqələr müzakirə edilib, müdafiə sənayesi üzrə əməkdaşlığın inkişafının zəruriliyi vurğulanıb, həmçinin beynəlxalq müdafiə sərgilərində qarşılıqlı iştirakın əhəmiyyətindən bəhs olunub. Danışıqlar zamanı maraq doğuran digər məsələlər haqqında fikir mübadiləsi aparılıb.
Xatırladaq ki, “ADEX-2024” və "Securex Caspian" sərgiləri sentyabrın 26-da yekunlaşacaq.