Bakı, 25 oktyabr.
2020-ci ilin sentyabrın 27-də başlayan Vətən müharibəsindəki Qələbəmizdən danışarkən Qubadlının işğaldan azad edilməsi naminə gedən döyüşlərə də xüsusi diqqət ayrılmalıdır. 44 günlük haqq savaşımızda ən qanlı döyüşlərin getdiyi ərazilərimizdən biri də həmin rayondur.
Rayon əsasən dağlıq ərazidə yerləşdiyindən burada hündürlüyü 1000-2000 metrdən yüksək olan bir neçə dağ zirvəsi var. Qubadlı rayonunu uzun illər işğalda saxlayan erməni silahlı birləşmələrinin buradakı yüksəkliklərdə yerləşməsi və bunun nəticəsində nail olduğu böyük strateji üstünlüklər düşmən qüvvələrinə güclü müqavimət göstərə bilmək imkanı verirdi. Bütün bunlara baxmayaraq, Müzəffər Ali Baş Komandanın əks-hücum əmrini böyük ruh yüksəkliyi ilə yerinə yetirən Ordumuzun şəxsi heyəti cəsarətlə, qorxmadan vuruşdu, düşmənin müqavimətini qıraraq onu geri çəkilməyə məcbur etdi.
Bu fikirləri Qubadlının işğaldan azad olunmasının növbəti ildönümü ilə bağlı açıqlamasında ehtiyatda olan polkovnik-leytenant, hərbi jurnalist İsa İsmayılov bildirib.
Vətən müharibəsinin getdiyi günləri xatırlayan hərbi jurnalistin fikrincə, Qubadlının əsasən dağlıq ərazi və strateji yüksəkliklərdən ibarət olduğunu nəzərə alan yuxarı komandanlığın hazırladığı əməliyyat planına əsasən, ilk növbədə, rayon ərazisindəki dağ zirvələrinin, strateji yüksəkliklərin düşməndən təmizlənməsi tapşırığının verilməsi faktı xüsusi olaraq vurğulanmalıdır.
“Qubadlı uğrunda döyüşlərdə Ordumuzun dəqiq zərbələri nəticəsində düşmən xeyli sayda canlı qüvvə, silah-sursat və hərbi texnika sarıdan itkilər verdi. Ordumuzun qarşısında tab gətirə bilməyən düşmən bir sıra mühüm yüksəkliklərdən və digər mövqelərdən geri çəkilməyə məcbur edildi. Artıq Ordumuzun şəxsi heyətinin döyüş əzmini real olaraq öz üzərində hiss edən düşmən döyüşə girməkdən imtina etməyə də başlamışdı, öz silah-texnikasını ataraq qaçırdı. Qubadlının azad edilməsi uğrunda döyüşlərdə düşmənin xeyli sayda silah-sursatı, tank və artilleriya qurğuları, digər hərbi vasitələri qənimət olaraq götürüldü”, - deyə o əlavə edib.
Hərbi jurnalist qürurla qeyd edib ki, oktyabrın 23-də artıq Qubadlı rayonunun 4 kəndi işğaldan azad olundu. Sonrakı günlərdə də yüksək döyüş ruhu, qələbə əzmi nümayiş etdirən bölmələrimiz Vətən müharibəsinin 29-cu günü, oktyabrın 25-də Qubadlı rayonunun bir neçə kəndini və Qubadlı şəhərini işğalçılardan azad etdi. Şəhərin mərkəzində Azərbaycan Bayrağı qaldırıldı və Ali Baş Komandana məruzə edildi. Qubadlının azad edilməsi barədə Prezidentin özünün rəsmi tviter səhifəsində paylaşdığı təbrik və Qələbə müjdəsi bütün xalqımız tərəfindən ruh yüksəkliyi ilə qarşılandı. Füzulinin azad edilməsindən sonra ikinci böyük qələbəmizi xalqımız böyük coşqu ilə qeyd etdi. Prezident İlham Əliyevin Fərmanına əsasən 25 Oktyabr - Qubadlı Şəhəri Günü kimi təsis edildi.
O bildirib ki, sonrakı günlərdə də artıq mütəşəkkil müqavimət göstərə bilməyən Ermənistan silahlı qüvvələrinin bölmələrinə sarsıdıcı zərbələr vuruldu və torpaqlarımızın azad edilməsi uğrunda döyüşlər davam etdi: “Bu gün qürur hissi ilə deyə bilərəm ki, digər döyüşlərdə olduğu kimi, Qubadlı istiqamətində də Ordumuzun nümayiş etdirdiyi igidlik və peşəkarlıq düşmənin canına qorxu saldı. Bu döyüşlərdəki uğurumuz digər istiqamətlərdəki qələbələrimizə stimul oldu.
“Digər yurd yerlərimizin azad edilməsində olduğu kimi, Qubadlı rayonunun azad edilməsi uğrunda igidliklə vuruşan silahdaşlarımızın əməyinin Müzəffər Ali Baş Komandan tərəfindən yüksək qiymətləndirilməsi, onlara fəxri adların verilməsi, orden və medallara layiq görülməsi minnətdarlıq hissi doğuran məqamdır və daima xüsusi olaraq vurğulanmalıdır.
Vətən müharibəsi günlərində Prezident İlham Əliyevin qələbə müjdəli müraciətlərini, paylaşımlarını xalqımız səbirsizliklə gözləyirdi və izdihamla qeyd edirdi. Vətən müharibəsində Qələbəmizdən 4 il ötür. Əminəm ki, yüz illər ötsə belə, şanlı Zəfərimizdə əməyi olanlar heç vaxt unudulmayacaq, ölkəmizin azadlığı və suverenliyi yolunda canından keçən soydaşlarımızın xatirəsi daima ehtiramla anılacaq”, - deyə o fikrini yekunlaşdırıb.