Ailə, Qadın və Uşaq Problemləri üzrə Dövlət Komitəsinin təşkilatçılığı ilə bələdiyyələrdə yaradılmış gender komissiyalarının üzvləri üçün “Gender bərabərliyi və yerli idarəetmə” mövzusunda təlim keçirilib.
Dövlət Komitəsinin sədr müavini Sədaqət Qəhrəmanova çıxış edərək, bu istiqamətdə mütəmadi olaraq həyata keçirilən maarifləndirici təlimlərin əhəmiyyətindən danışıb.
Bələdiyyələrdə yaradılan gender komissiyalarının fəaliyyətinin təkmilləşdirilməsinin vacibliyini vurğulayan S.Qəhrəmanova bu komissiyaların risk qrupundan olan ailələrin müəyyən edilməsində rol oynamaqla yanaşı, həmin ailələrdə gender münasibətlərinin formalaşmasına töhfə verə biləcəyini söyləyib.
Daha sonra təlimçi - gender mütəxəssisi Şəhla İsmayıl təqdimatla çıxış edərək gender bərabərliyi konsepsiyası və çərçivəsi, gender lüğəti və əsas anlayışların izahı, gender bərabərsizliyinin səbəbləri və nəticələrindən danışıb.
Sonra ailədə gender rolları ilə bağlı videoçarx nümayiş etdirilib.
Təlim “Yerli idarəetmə sektorunda gender bərabərliyi” adlı 2-ci sessiya ilə davam edib. Sessiya çərçivəsində ölkəmizdə gender siyasəti və qanunvericilik bazası, Azərbaycanın beynəlxalq gender öhdəlikləri, yerli idarəetmədə gender prinsiplərinin tətbiqi mövzuları üzrə müzakirələr aparılıb.
Qeyd edək ki, Ailə, Qadın və Uşaq Problemləri üzrə Dövlət Komitəsi bələdiyyələrin hüquq və vəzifələri, gender bərabərliyinin təmin olunması istiqamətində mövcud problemlər, gender bərabərliyinin təbliği ilə bağlı gender komissiyalarının üzərinə düşən vəzifələr barədə məlumatlılıq səviyyəsinin artırılması məqsədilə mütəmadi olaraq təlimlər keçirir.