BDU “QS Stars” audit qiymətləndirilməsində 5 ulduza layiq görülüb
ELM VƏ TƏHSİL
BDU “QS Stars” audit qiymətləndirilməsində 5 ulduza layiq görülüb
17.02.2025 [10:09]
BDU “QS Stars” audit qiymətləndirilməsində 5 ulduza layiq görülüb
Bakı, 17 fevral.
Bakı Dövlət Universiteti (BDU) daha bir beynəlxalq uğura imza ataraq “QS Quacquarelli Symonds” agentliyi tərəfindən aparılan “QS Stars” auditində 5 ulduz (“excellent” - “mükəmməl”) ilə qiymətləndirilib.
Bu barədə BDU-dan məlumat verilib. Bu nəticə BDU-nun təhsil, elmi-tədqiqatlar, akademik inkişaf, məzunların məşğulluq imkanları, infrastruktur və idarəetmə sahələrində beynəlxalq standartlara uyğun fəaliyyət göstərdiyini bir daha təsdiqləyir. BDU-nun əldə etdiyi yüksək göstərici strateji inkişaf planının uğurla həyata keçirildiyini və müasir ali təhsil tələblərinə uyğun keyfiyyətli tədris mühitinin yaradıldığını sübut edir.
BDU “QS Stars” auditində 9 fərqli kateqoriya üzrə qiymətləndirilib və onlardan 7 kateqoriya üzrə maksimal 5 ulduz (“mükəmməl”) əldə edib.
Kateqoriyalar üzrə nəticələr aşağıdakı kimidir:
- Tədris (“Teaching”) – 5 ulduz (“mükəmməl”)
BDU tələbələrə yüksəkkeyfiyyətli tədris mühiti təqdim etdiyi və müasir pedaqoji metodlardan istifadə etdiyi üçün tədris kateqoriyasında ən yüksək qiymətləndirməni alıb. Universitetin peşəkar professor-müəllim heyəti, interaktiv tədris metodları və innovativ yanaşmaları bu uğurun əsas səbəblərindəndir.
- Akademik inkişaf (“Academic Development”) – 5 ulduz (“mükəmməl”)
BDU-da tələbələrin akademik inkişafına xüsusi diqqət yetirilir. Universitet daim təhsil proqramlarını yeniləyir, müəllimlərin və tələbələrin elmi fəaliyyətini dəstəkləyir və onların beynəlxalq akademik mühitə inteqrasiyasına şərait yaradır.
- İnfrastruktur (“Facilities”) – 5 ulduz (“mükəmməl”)
BDU müasir laboratoriyalar, yüksəksəviyyəli elmi-tədqiqat mərkəzləri, tələbələr üçün rahat kitabxana və yataqxana şəraiti ilə seçilir. Universitetin infrastrukturu müasir texnologiyalar və innovativ yanaşmalar əsasında təkmilləşdirilir.
- Məşğulluq (“Employability”) – 5 ulduz (“mükəmməl”)
Məzunlarının uğurlu karyera qurmasına dəstək olan BDU əmək bazarının tələblərinə uyğun kadr hazırlığı aparır. BDU məzunlarının dünya miqyasında məşğulluq səviyyəsinin yüksək olması, iş dünyası ilə sıx əməkdaşlıq və peşə yönümlü təcrübə proqramları bu kateqoriyada 5 ulduz qazanmağa imkan yaradıb.
- Ətraf mühitə təsir (“Environmental Impact”) – 5 ulduz (“mükəmməl”)
BDU dayanıqlı inkişaf prinsiplərini və ekoloji təşəbbüsləri aktiv şəkildə həyata keçirir. Universitet yaşıl kampus təşəbbüsləri, enerji effektivliyi və ekoloji maarifləndirmə sahəsindəki layihələri ilə yüksək qiymətləndirilib.
- Müxtəliflik, bərabərlik və inklüzivlik (“Diversity, Equity & Inclusion”) – 5 ulduz (“mükəmməl”)
BDU multikultural və inklüziv mühitin təmin olunması, beynəlxalq tələbələr üçün geniş imkanlar yaradılması və gender bərabərliyinin təşviqi sahəsində nümunəvi fəaliyyət göstərir. Universitetdə müxtəlif sosial təbəqələrdən olan tələbələr üçün bərabər imkanlar yaradılması da bu uğura töhfə verib.
- Yaxşı idarəçilik (“Good Governance”) – 5 ulduz (“mükəmməl”)
BDU səmərəli idarəetmə strategiyaları, şəffaf qərar qəbuletmə prosesi və innovativ universitet rəhbərliyi sayəsində “yaxşı idarəçilik” kateqoriyasında da ən yüksək nəticəni əldə edib.
Qlobal iştirak (“Global Engagement”) – 4 ulduz (“çox yaxşı”)
BDU beynəlxalq əlaqələrini daim genişləndirir, dünya universitetləri ilə əməkdaşlıq edir və beynəlxalq akademik mühitdə fəal iştirak edir. Bu istiqamətdə görülən işlərin intensivləşdirilməsi universitetin gələcək reytinq göstəricilərinə müsbət təsir edəcək.
- Proqramın üstünlükləri: Kimya (“Program Strength: Chemistry”) – 4 ulduz (“çox yaxşı”)
BDU-nun kimya sahəsində əldə etdiyi nəticələr yüksək səviyyədə qiymətləndirilib. BDU bu sahədə tədqiqatların daha da genişləndirilməsi və yeni elmi nailiyyətlərin qazanılması istiqamətində fəaliyyətini davam etdirir.
“QS Stars” ali təhsil müəssisələrinin müxtəlif fəaliyyət sahələrini dəyərləndirən beynəlxalq reytinq sistemidir. Bu sistem universitetlərin güclü tərəflərini və inkişaf etdirilməli sahələrini müəyyən etməyə, eləcə də onların qlobal səviyyədə tanınmasına kömək etməyə yönəlib. “QS Stars” auditində 5 ulduz almaq universitetin yüksək akademik və idarəetmə keyfiyyətinə malik olduğunu sübut edir.
Bu nailiyyət BDU-nun dünya miqyasında nüfuzunun artmasına və beynəlxalq ali təhsil məkanında tanınmasına mühüm töhfə verəcək.
Bu möhtəşəm nəticə BDU kollektivinin fədakar əməyi, müasir ali təhsil tələblərinə uyğun inkişaf strategiyası və keyfiyyətli tədris mühiti yaradılması istiqamətində atılan addımlar sayəsində əldə edilib.
Universitet gələcəkdə də:
- Beynəlxalq reytinqlərdə mövqeyini daha da gücləndirmək;
- Elmi tədqiqatları inkişaf etdirmək və dünya elminə töhfə vermək;
- İnnovativ tədris və idarəetmə metodlarını tətbiq etmək;
- Qlobal akademik əməkdaşlıqları genişləndirmək və tələbələrə yüksək keyfiyyətli təhsil mühiti təqdim etmək istiqamətində fəaliyyətini davam etdirəcək.
BDU rəhbərliyi bu uğurun qazanılmasında əməyi olan bütün akademik və inzibati heyətə, tələbələrə və tərəfdaş qurumlara dərin minnətdarlığını bildirir. BDU bu uğurla kifayətlənməyərək, beynəlxalq akademik arenada daha böyük nailiyyətlərə imza atmaq əzmindədir.
BDU ölkədə “QS Stars” auditindən keçən digər ali təhsil müəssisələrinə də uğurlar arzulayır və onların da qlobal akademik mühitdə layiqli mövqeyə sahib olmalarını dəstəkləyir.
