Ukraynanın Poltava şəhərində Novruz bayramı qeyd edilib
Ukraynanın Poltava şəhərində Novruz bayramı münasibətilə tədbir keçirilib.
Ukrayna Azərbaycanlıları Radası Poltava vilayəti təşkilatının və Diasporla İş üzrə Dövlət Komitəsinin birgə təşkilatçılığı ilə keçirilən tədbirdə Poltavadan olan deputatlar, diaspor fəalları, ictimaiyyət nümayəndələri, media təmsilçiləri iştirak ediblər.
Ukrayna Azərbaycanlıları Radasının Poltava vilayət təşkilatının rəhbəri Füzuli Qənbərov bildirib ki, ən çox hava hücumlarına məruz qalan şəhərlərdən olan Poltavada Novruz bayramının qeyd edilməsi Ukraynada yaşayan soydaşlarımızın birliyinin, adət-ənənələrimizin xarici ölkələrdə təbliğinin göstəricisidir.
“Novruz bayramı baharın gəlişini, təbiətin oyanışını və yeni həyatın başlanğıcını simvolizə edən ən qədim bayramlardan biridir. Diaspor fəallarımızın Ukraynanın çətin günündə bu tədbiri keçirməsi xalqımızın birliyinin rəmzidir. Novruz bayramı Müzəffər Ali Baş Komandan İlham Əliyevin rəhbərliyi və Azərbaycan Ordusunun şücaəti nəticəsində işğaldan azad olunmuş Azərbaycanın bütün suveren torpaqlarında qeyd edilir”, - deyə diaspor rəhbəri əlavə edib.
Digər çıxışçılar bildirib ki, Novruz bayramının bu şəhərdə keçirilməsi artıq ənənəyə çevrilib və bu da Azərbaycan diasporunun fəallığının göstəricisidir.
Tədbirin sonunda Novruz tonqalı yandırılıb.
