Vəkillər üçün “Cinayət işlərində müdafiə taktikasının qurulması” mövzusunda təlim keçirilib
Vəkillər Kollegiyası Akademiyasının təşkilatçılığı ilə "Cinayət işlərində müdafiə taktikasının qurulması (ibtidai araşdırma və məhkəmə mərhələləri)" mövzusunda hibrid formada təlim keçirilib.
Bu barədə Vəkillər Kollegiyasından bildirilib. Təlimdə çıxış edən Vəkillər Kollegiyası Akademiyasının rektoru professor Əmir Əliyev mövzunun hüquqi əhəmiyyəti barədə bəzi məqamlara toxunub. Həmçinin “Azərbaycan vəkili” elmi-praktik hüquq jurnalı iştirakçılara təqdim olunub, jurnalın elmi əhəmiyyəti onların diqqətinə çatdırılıb.
Təlimin əsas hissəsində Vəkillər Kollegiyasının Rəyasət Heyətinin üzvü, Bakı şəhəri 20 saylı Vəkil Bürosunun müdiri İlhamə Həsənova cinayət işlərində müdafiə taktikasının müəyyən edilməsi, əsasları, prinsipləri, müdafiə taktikasının məqsədləri və mərhələləri, müvafiq dəlillərin toplanması, o cümlədən mövzu üzrə məhkəmə təcrübəsi barədə ətraflı çıxış edib. Təlim interaktiv formada davam edib və sonda vəkillərin müvafiq sahədə çoxsaylı sualları cavablandırılıb.
Təlimdə Vəkillər Kollegiyasının ümumilikdə 85 üzvü iştirak edib.
