Bakı, 29 iyun.

“Son günlər Rusiyanın Yekaterinburq şəhərində baş verən qandonduran hadisələr böyük hiddətlə qarşılanır. Gecə ikən qapını sındırıb evlərə soxulmaq, ailə üzvlərinin gözləri qarşısında zorakılıq hərəkətləri etmək, heç bir xəbərdarlıq etmədən və sorğu-sual aparmadan adamlara divan tutmaq, işgəncə vermək nə deməkdir? Özünü “sülhün böyük carçısı”, “xalqlar dostluğunun beşiyi” adlandıran ölkənin siyasi varisi elan edən Rusiyanın “humanizmi”, “beynəlmiləlçiyi” bundan ibarətdirmi? Günahı olduğu sübut edilmədən, məhkəməyə çıxarılmadan OMON-çuların mənzillərə soxulması, heç bir dəlil-sübutsuz “istintaq aparılması” adı ilə həbs edilməsi və işgəncə maşının altına verilməsinə, bədənlərinə elektrik cərəyanı qoşulmasına, ən ağlasığmaz metodlarla zor tətbiq edilərək qətlə yetirilməsinə faşizmdən başqa nə ad vermək olar? Yeni imperiya yaratmaq sevdasına düşən ölkədə miqrantlara qarşı yeridilən bu siyasət, şovinizm və diskriminasiya beynəlxalq hüququn hansı normalarına uyğun gəlir?”

Bu sözləri Beynəlxalq Avrasiya Mətbuat Fondunun rəhbəri Umud Rəhimoğlu Yekaterinburq şəhərində soydaşlarımıza qarşı törədilən zorakılıq və vəhşilik əməllərinə münasibət bildirirərkən deyib.

Onun dediyinə görə, milli ayrı-seçkilik, ölkənin sakini olan miqrantlara qarşı qarayaxmalar, digər xalqlara, qeyri-ruslara qarşı təhdidlər Rusiya hökumətinə nəinki başucalığı gətirmir, əksinə, bu gün ölkənin cəngəllik qanunları ilə idarə olunduğunu göstərir: “Başı müharibə alovlarına qarışan ölkədə miqrantların, o cümlədən soydaşlarımızın səfərbərliyə alınaraq döyüş cəbhələrinə göndərilməsi, bunun müqabilində əksər hallarda onlara kompensasiya verilməməsi, müxtəlif şəhərlərdə öz zəhməti ilə halal çörək qazanan azərbaycanlıların öz iş yerlərindən, ev-eşiklərindən qovulması, onların etmədikləri əməllərdə, törətmədikləri cinayət hadisələrində günahlandırılması belə düşünməyə əsas verir. İndi dünyanın hansı əyyamı, zamanın hansı vaxtıdır ki, öz millətindən olmayanlara düşmən kimi baxasan?! Bütün dünya bəşəri duyğulardan, humanizm prinsiplərindən danışır, Rusiya hələ də feodal təsəvvürlərdən uzaqlaşa bilmir”.

Müsahibimiz daha sonra deyib: “Xalqımızın ləyaqətli nümayəndələrinə qarşı törədilən diskriminasiya halları getdikcə artır. Təkcə son altı ayı göz önünə gətirsək, xeyli belə hadisə sadalamaq olar: Ötən ilin dekabrında Qroznıya uçan təyyarənin vurulması, Azərbaycan Milli Məclisinin deputatının Həştərxana buraxılmaması, ölkəmizin bir sıra media qurumlarına qarşı yönələn kiberhücumlar... Rusiya hökuməti baş verən bütün bu əməllərə görə üzr istəmək əvəzinə heç nə olmamış kimi susqunluq göstərir. Əlbəttə ki, insanlığa qarşı yönələn qanunazidd əməllərin cavabsız qalması bir-birinin ardınca yeni cinayətlərin törədilməsinə səbəb olur. Halbuki kimliyindən asılı olmayaraq bu vəhşiliyi törədənlər vaxtında layiqli cəzalarını alsalar, məsələ gəlib bu yerə çıxmazdı. Bir el məsəlində deyildiyi kimi, bıçaq sümüyə dirənib. Kremlin irqçi və məkrli siyasəti dünyada böyük çaxnaşmalara, müharibəyə, qan tökülməsinə, xalqlar arasında ədavətə aparıb çıxarır, cəzasızlıq mühiti isə kriminal ünsürlərin daha geniş əl-qol açması ilə nəticələnir. Rusiya hökuməti təcili olaraq həmin hərəkətlərin qarşısını almalı, müsəlman mənşəli vətəndaşlara qarşı yönələn vəhşiliyə son qoymalı, həmin əməlləri törədənləri dərhal tapıb cəzalandırmalı, xalqlar arasında yaranan uçurumun dərinləşməsinə imkan verməməlidir. Əks halda bu hərəkətlər daha böyük fəlakətlərə və qarşıdurmalara aparıb çıxara bilər”.