® Mərkəzi Gömrük Hospitalında yeni rezidentlərlə görüş keçirilib
Görüşdə Mərkəzi Gömrük Hospitalının rəisi-Baş həkimi, tibb elmləri doktoru Bəxtiyar Musayev çıxış edərək rəhbərlik etdiyi sağlamlıq müəssisəsinin Azərbaycan səhiyyəsində xüsusi yeri olduğunu bildirib və burada həyata keçirilən unikal əməliyyatlar, pandemiya dövründə COVID-19 infeksiyasına yoluxmuş xəstələrin müalicəsində Azərbaycanda ilk dəfə uğurla tətbiq olunan EKMO cihazı, eləcə də xarici tərəfdaşlar olan Florence Nightingale Xəstəxanalar Qrupu, Böyük Britaniyanın Birmingem Qadın və Uşaq Hospitalı və digər tibb müəssisələri ilə əməkdaşlıq imkanları barədə geniş məlumat verib. Həmçinin qeyd olunub ki, hospital gənc mütəxəssislərə nəzəri biliklərlə yanaşı, ən müasir texnologiyalar üzərində praktiki təcrübə qazanmaq üçün geniş imkanlar yaradır. O, yeni rezidentləri təbrik edərək onlara uğurlar arzulayıb, təhsil aldıqları müddətdə daim öyrənməyə, elmi yenilikləri izləməyə və xəstələrin sağlamlığını hər şeydən üstün tutmağa çağırıb.
Dövlət Gömrük Komitəsi Tibbi Xidmət İdarəsinin rəis müavini, tibb üzrə fəlsəfə doktoru, dosent İsmayıl Əfəndiyev rezidentlərin yüksəkixtisaslı həkim kimi yetişməsi, elmi araşdırmaların aparılması üçün onlara yaradılan imkanlar haqqında ətraflı məlumat verib. O, rezidentlər üçün beynəlxalq mübadilə proqramlarında iştirak etmək imkanları, tədris proqramının faydalı yerinə yetirilməsi, eləcə də rezidentlərin öz sahələri üzrə xarici ölkələrdə və ölkədaxili konfranslarda, konqreslərdə, rotasiyalarda iştirak etmək imkanları barədə danışıb. Yerli və beynəlxalq ekspertlərin iştirakı ilə keçirilən həmin konfransların onların gələcəkdə peşəkar həkim kimi yetişməsində əhəmiyyətli rola malik olduğu bildirilib.
Görüşün yekununda həkim-rezidentlərin sualları cavablandırılıb.
