Gəncə, 26 sentyabr.
Azərbaycan xalqının yaddaşına əbədi həkk olunmuş 27 Sentyabr tarixi hər birimizin qəlbində həm hüzn, həm də qürur hissi ilə anılır. 2020-ci ilin bu günündə Vətənimizin bütövlüyü, ərazi toxunulmazlığı uğrunda haqq savaşına qalxan igid oğullarımızın qanı, canı bahasına yazılan qəhrəmanlıq səhifəsi başladı.
Bu fikirləri Dövlət Aqrar Universitetinin rektoru Zəfər Qurbanov deyib.
“Bu gün biz şəhidlərimizi ehtiramla yad edərkən onların göstərdiyi fədakarlığın böyüklüyünü bir daha dərk edirik. Bu, Vətən sevgisinin ən uca zirvəsidir. Onlar torpağın, bayrağın, azadlığın necə uca dəyər olduğunu əməlləri ilə sübut etdilər. Şanlı Zəfərlə başa çatan 44 günlük Vətən müharibəsinin başladığı 27 Sentyabr yalnız bir müharibənin başlanğıc tarixi deyil, xalqımızın yumruq kimi birləşərək milli iradəsini nümayiş etdirdiyi, sarsılmaz həmrəyliyini göstərdiyi gündür,” - deyə rektor bu qürurlu tarixdən danışarkən qeyd edib.
O, Vətən müharibəsində qazanılan şanlı Qələbənin əsrlər boyu qürurla xatırlanacağını vurğulayıb, bu qalibiyyətin memarı Prezident, Müzəffər Ali Baş Komandan İlham Əliyevin adının həm hərb tariximizə, həm də xalqımızın qəlbinə əbədi həkk olunduğunu diqqətə çatdırıb.
Hər bir tələbə və gəncin vətənpərvərlik ruhunda yetişməsinin vacibliyini bildirən Zəfər Qurbanov onların əsgər və zabitlərimizin qəhrəmanlığını örnək alaraq elm və təhsildə daha böyük uğurlara imza atacağını ümid etdiyini deyib: “Aqrar Universitet ailəsi olaraq biz də həmin qəhrəmanların ruhu qarşısında baş əyirik. Müstəqil və güclü dövlətin gələcəyi yalnız qəhrəman əsgərlərin deyil, həm də savadlı, milli dəyərlərə sadiq gənclərin üzərində qurulur. Gənclərimizin bu ruhda böyüməsi və tərbiyə alması üçün əlimizdən gələni edirik. Şəhidlərimizə Allahdan rəhmət, qazilərimizə cansağlığı diləyir, Azərbaycan xalqına isə Prezidentin rəhbərliyi ilə daim qalibiyyət, birlik və firavanlıq arzulayıram”.