Şəhid övladları Türkiyənin Kosmik Aviasiya Tədqiqat Mərkəzində qış düşərgəsində iştirak edirlər
Şəhid ailələrinin övladlarına kosmos və texnologiya sahəsində bilik və təcrübə qazandırmaq məqsədilə noyabrın 25-dən 30-dək Türkiyənin GUHEM mərkəzində qış düşərgəsi təşkil olunur.
Azərbaycan Kosmik Agentliyindən bildirilib ki, layihə "Azərkosmos"un nəzdində fəaliyyət göstərən KOSMİK Akademiyanın təşkilatçılığı, Azərbaycan Milli Antidopinq Agentliyi, Türkiyənin Kosmik Aviasiya Tədqiqat Mərkəzi (GUHEM) və “Zəfər” Şəhid Ailələrinə Dəstək İctimai Birliyinin dəstəyi ilə həyata keçirilir.
Qış düşərgəsində Azərbaycanın müxtəlif bölgələrindən olan 10 şəhid ailəsinin övladları iştirak edirlər. Düşərgə çərçivəsində iştirakçılar yüksək texnologiyalar, kosmos, innovasiya və süni intellekt kimi sahələrdə təcrübələr əldə edəcək, müasir texnoloji alətlərdən istifadə edərək praktiki məşğələlər keçəcəklər.
GUHEM Bursa Ticarət və Sənaye Palatasının rəhbərliyi altında və Bursa Böyükşəhər Bələdiyyəsi ilə Türkiyənin Elmi və Texnoloji Araşdırmalar Şurası ilə əməkdaşlıq çərçivəsində yaradılmış 13 000 kvadratmetr sahəni əhatə edən mərkəzdir. GUHEM kosmos və aviasiya texnologiyalarının inkişafını təşviq etməklə yanaşı, innovasiya, rəqəmsallaşma və İKT ekosisteminin inkişafı üçün müxtəlif layihə və proqramlar təqdim edir.
