Bakı, 31 Dekabr.

2025-ci ildə Azərbaycan Dövlət Pedaqoji Universitetində (ADPU) media yayımı istiqamətində yüksək inkişaf dinamikası qeydə alınıb.

Universitetdən bildiriblər ki, il ərzində İctimaiyyətlə əlaqələr və marketinq şöbəsi tərəfindən universitetin tədris və ictimai-sosial həyatında baş verən yeniliklər, layihə və tədbirlər ölkənin aparıcı media orqanlarında, agentlik və telekanallarında işıqlandırılıb, ADPU-nun mətbu orqanı olan “Gənc müəllim” qəzeti çap və elektron qaydada dərc olunaraq yayımı həyata keçirilib.

İlin media yekunlarına əsasən, 2025-ci il ərzində ADPU ilə bağlı 600 xəbər 4570 mənbədə dərc edilib.

Xəbər yayımının daha da operativləşdirilməsi və əhatə dairəsinin genişləndirilməsi məqsədilə yaradılmış votsap kanalının izləyici sayında 4,1 dəfə artım qeydə alınıb. İl ərzində kanalda yayımlanan məlumatlar 68.000 nəfərə çatıb. ADPU-nun rəsmi linkedin hesabının izləyici sayı 7742 izləyiciyə yüksəlib, bu, 1 il ərzində 13 dəfə artım deməkdir. ADPU-nun rəsmi feysbuk səhifəsinin izləyici sayı il ərzində 12 % artıb. İl ərzində səhifədə paylaşılan postlar 3,1 milyon istifadəçiyə çatıb. Rəsmi instaqram səhifəsinin izləyici sayı isə il ərzində 27,4 minə yüksəlib, bu göstərici ötən illə müqayisədə 20 faiz çoxdur. Səhifədə paylaşılmış post və videolar 17 milyon dəfədən artıq izlənilib. Rəsmi teleqram kanalında paylaşılan məlumatlar il ərzində 2,4 milyon nəfərə çatıb ki, bu göstərici 2024-cü illə müqayisədə 1,3 dəfə çoxdur.

Cari ildən etibarən şöbə tərəfindən aparılan əsas islahatlardan biri də ənənəvi informasiya yayımı ilə yanaşı, videoinformasiya yayımının da genişləndirilməsi olub. Bu istiqamətdə həyata keçirilən fəaliyyətlərdə "ADPU TV" könüllü komandası xüsusi aktivlik göstərib. İl ərzində "ADPU TV" instaqram hesabında, tiktok və yutub kanalında ümumilikdə 150-dək videoməzmun paylaşılıb ki, bu videolar ümumilikdə 2,5 milyondan çox izlənilib. ADPU-nun rəsmi sosial şəbəkə hesabları və "ADPU TV"nin səhifələri daxil olmaqla il ərzində ADPU haqqında paylaşılan məlumat postları 25 milyon dəfədən artıq izlənilib. Bu 2024-cü ilə nəzərən 2,5 dəfə artım deməkdir.

İl ərzində tələbə və vətəndaşlar tərəfindən sosial şəbəkə və digər əlaqə vasitələri ilə daxil olmuş 68.000-dən çox müraciət cavablandırılıb. Ötən ilin analoji dövrü ilə müqayisədə bu say 25 %-dən çox artıb.

Bundan əlavə, şöbə tərəfindən cari ildə universitetin istedadlı tələbələrini aşkar edərək onların peşəkar inkişafına dəstək olmaq və gələcək kadr bankı formalaşdırmaq məqsədilə ADPU və onun filiallarının bakalavriat və magistratura səviyyəsində təhsil alan tələbələr üçün “Pedaqoji Universitetin Gələcək Təhsil Liderləri” müsabiqəsinin II mövsümü təşkil edilib və uğurla yekunlaşıb. 800-ə yaxın tələbə-gəncin iştirak etdiyi müsabiqənin yekununda 10 qalib tələbə pul mükafatı və Təşkilat Komitəsinin üzvü olan ADPU-nun rəhbər heyəti ilə 1 illik mentorluq proqramından faydalanmaq şansı əldə ediblər. Hazırda müsabiqə qaliblərinin mentoruq proqramı uğurla davam edir.