Berlin, 8 aprel.

ABŞ ilə İran arasında ikihəftəlik atəşkəslə bağlı razılığın əldə olunması Avropa İttifaqının (Aİ) rəsmiləri tərəfindən böyük məmnunluqla qarşılanıb.
Aİ rəsmiləri atəşkəsin münaqişənin eskalasiyasının qarşısının alınmasına imkan verdiyini vurğulamaqla yanaşı, tərəflər arasında razılığın əldə olunmasına görə Pakistanın vasitəçilik missiyasını yüksək qiymətləndiriblər.

Aİ Şurasının Prezidenti Antonio Koşta Yaxın Şərqdə ikihəftəlik atəşkəs xəbərini alqışlayaraq, regionda davamlı sülhə nail olmaq üçün bütün tərəfləri onun şərtlərinə əməl etməyə çağırıb: “Aİ davam edən səyləri dəstəkləməyə hazırdır və regiondakı tərəfdaşları ilə sıx əlaqə saxlayır. Pakistana və bu razılaşmanın əldə edilməsində iştirak edən bütün digər tərəflərə təşəkkür edirəm”.

Avropa Komissiyasının Prezidenti Ursula Fon der Lyayen X platformasındakı səhifəsində etdiyi paylaşımda ABŞ-nin və İranın dünən gecə iki həftəlik atəşkəs barədə razılığa gəlməsini alqışlayaraq bildirib: “Bu, çox ehtiyac duyulan deeskalasiyaya yol açır. Vasitəçiliyinə görə Pakistana təşəkkür edirəm. İndi bu münaqişənin davamlı həlli üçün danışıqların davam etdirilməsi çox vacibdir. Bu məqsədlə tərəfdaşlarımızla koordinasiyanı davam etdirəcəyik”.

Aİ-nin ali nümayəndəsi, Avropa Komissiyasının vitse-prezidenti Kaya Kallas da X hesabındakı paylaşımında həftələrdir davam edən gərginlikdən sonra atəşkəsin əldə olunmasını yüksək qiymətləndirərək qeyd edib: “Bu, təhdidləri azaltmaq, raketləri dayandırmaq, gəmiçiliyi yenidən başlatmaq və davamlı razılaşma istiqamətində diplomatiyaya şərait yaratmaq üçün çox ehtiyac duyulan şans yaradır. Hörmüz boğazı yenidən keçid üçün açıq olmalıdır”.

O, həmçinin Pakistanın xarici işlər naziri ilə vəziyyəti müzakirə etdiyini və razılaşmanın əldə olunmasına görə təşəkkürünü bildirdiyini vurğulayaraq qeyd edib ki, müharibənin əsas səbəbləri həll olunmadığı üçün vasitəçilik qapısı açıq qalmalıdır. Aİ bu səyləri dəstəkləməyə hazırdır və regiondakı tərəfdaşlarla əlaqə saxlayır.

Aİ-nin ən böyük iqtisadiyyatına sahib Almaniya hökuməti də atəşkəs razılaşmasını yüksək dəyərləndirib. Almaniya Kansleri Fridrix Merts bu barədə paylaşımında ABŞ və İran arasında əldə edilən iki həftəlik atəşkəsi alqışlayaraq, vasitəçiliyinə görə Pakistana təşəkkür edib: “İndi məqsəd müharibəyə davamlı son qoymaq üçün danışıqlar aparmaqdır. Bu məsələdə tərəfdaşlarımızla sıx əməkdaşlıq edirik”.

Almaniyanın xarici işlər naziri Yohan Vadeful da atəşkəs razılaşmasını alqışlayaraq qeyd edib: “Bu, davamlı sülhə aparan yolda ilk qəti addım olmalıdır, çünki müharibənin davam etməsinin nəticələri hesablana bilməz. Almaniya bu diplomatiya yolunu bacardığı qədər dəstəkləyəcək”.

Bölgədə münaqişənin ilk günlərindən qətiyyətli mövqeyi ilə seçilən İspaniya hökuməti də atəşkəsin davamlı sülhlə nəticələnməsinin önəmini vurğulayıb. İspaniyanın Baş naziri Pedro Sançez X paylaşımında müvəqqəti yüngülləşmənin xaosu, dağıntıları və itirilmiş həyatları unutdurmamasının vacibliyini qeyd edib: “İspaniya hökuməti dünyanı oda verənləri təkcə bir vedrə su ilə ortaya çıxdıqlarına görə alqışlamayacaq. İndi lazım olan diplomatiya, beynəlxalq hüquq və sülhdür”.