Litvada son 10 il ərzində birdəfəlik qablaşdırmanın sayı 40 faiz artıb və hökumət bu qabların ödənişsiz paylanmasının daha mümkün olmayacağını bəyan edib.
Ölkənin ətraf mühit naziri Simonas Gentvilasın sözlərinə görə, Litvanın daha az qablaşdırmadan istifadəyə keçməsi vaxtıdır. Nazir bildirib ki, kafedə yemək və içkini çoxdəfəli istifadə olunan qablarda vermək lazımdır. Müştərilər isə əlavə ödənişə razı olduqları təqdirdə plastik qabda yeməlidirlər. O deyib: “Əgər siz haradasa kafedə nahar edirsinizsə, o halda sizə mütləq metal, çoxdəfəli istifadə edilən qaşıq və çəngəllər təklif olunmalıdır”.
Eyni zamanda, Litvanın Ətraf Mühit Nazirliyi heç də bütün növ qablaşdırmaların deyil, təkcə plastik və qarışıq qablaşdırmanın pulsuz yayılmasına qadağanı təklif edir: məsələn, mayenin axmaması üçün plastik örtüklü kağız stəkanlar üçün ödəniş toplamaq. Digər kağız qablaşdırma əvvəlki kimi pulsuz veriləcək. “Pizza üçün karton qutulardan istifadə olunmasına icazə verilib”, - deyə Simonas Gentvilas vurğulayıb.
Lakin qablaşdırmada dəyişiklik təqdim edən Seymin üzvləri belə yanaşma ilə razı deyillər. Təklifin təşəbbüskarı Kasparas Adomaytisin fikrincə, pizza üçün qutunu və kağız stəkanları ayırmaq düzgün deyil. “Mən belə istisnalar etməzdim. Mənə elə gəlir ki, yekunda bütün birdəfəlik məmulatlar təbiət üçün zərərlidir və onların hər ikisini təkrar istehsal etmək çətindir”, - deyə o qeyd edib.
Kafelərin sahibləri isə çoxdəfəli istifadə olunan qablarda kofe və isti yeməklərin satılması zamanı gigiyena qaydalarının pozulmasından ehtiyat edirlər. “Biz yeməyin keyfiyyətinə görə məsuliyyət daşıyırıq, lakin qab-qacağın gigiyenik cəhətdən yuyulub-yuyulmamasına zəmanət verə bilmərik”, - deyə kafe şəbəkələrindən birinin təmsilçisi bəyan edib.
Öz növbəsində, iqtisadçılar deyirlər ki, kafe, restoran və “fast-food” şəbəkələrində qablaşdırmaya görə ödəniş onlara əlavə gəlir qazanmağa imkan verməyəcək. Əhali üçün qida xidmətləri il ərzində artıq 10 dəfə bahalaşıb, kafelərdə yemək yenə də bahalaşa bilər, nazir isə bu barədə danışmaq belə istəmir. “Mən bu sualı cavablandırmaq istəmirəm”, - deyə o, jurnalistlərə bildirib.