Abşeronda fəaliyyət göstərən sahibkarlarla görüş keçirilib
Kiçik və Orta Biznesi İnkişafı Agentliyinə istinadla xəbər verilir ki, görüşdə KOBİA-nın İdarə Heyətinin sədri Orxan Məmmədov və agentliyin aidiyyəti struktur bölmələrinin rəhbərləri, Abşeron Rayon İcra Hakimiyyətinin başçısı Abdin Fərzəliyev, rayonda kənd təsərrüfatı, tikinti, qida, mebel istehsalı və alternativ enerji sektorlarında fəaliyyət göstərən 120-dən çox KOB subyekti iştirak edib.
Tədbirdə sahibkarlara göstərilən dövlət dəstəyi tədbirləri və dəstək mexanizmləri, yeni çağırışlar, rayonun iqtisadi potensialı və biznes imkanları barədə məlumat verilib. Sahibkarların təklifləri və təşəbbüsləri əsasında dövlətin dəstəyi tədbirlərinin davam etdiriləcəyi qeyd olunub.
İş adamları ilə sahibkarlıq fəaliyyətinin maliyyələşdirilməsi, torpaqların təyinatının dəyişdirilməsi, Qarabağda yeni bizneslərin yaradılması, iri ticarət şəbəkələrinə çıxışa dəstək, yeni bazarlarla əlaqələrin qurulması, xarici ölkə sahibkarları ilə təcrübə mübadiləsinə dəstək, sənaye zonalarının imkanlarının artırılması, kommunal xidmətlər, biznes inkubatorların yaradılması, qadın və gənc sahibkarlar üçün yeni dəstək mexanizmlərinin formalaşdırılması kimi məsələlər barədə müzakirələr aparılıb.
Görüşdə, həmçinin sahibkarların çətinlikləri və təşəbbüsləri dinlənilib, sualları cavablandırılıb.
