ÜMT: Rekord səviyyədə ekstremal isti hava şəraiti avqustda da davam edir
Ümumdünya Meteorologiya Təşkilatının (ÜMT) son hesabatında bildirilir ki, iyul ayında və avqustun ilk günlərində bütün dünyada ekstremal istilərlə bağlı rekordlar qeydə alınıb.
BMT-nin məlumatına istinadla xəbər verilir r ki, Pekindəki Dünya Meteorologiya Mərkəzi isti dalğalarının Çin, Yaponiya, Cənubi Koreyada, həmçinin Pireney yarımadasında və Meksikanın şimalında davam edəcəyini proqnozlaşdırır. Bu bölgələrdə maksimum temperaturun 38 ilə 40 dərəcə Selsi arasında olacağı, Səudiyyə Ərəbistanı, İraq, İran, Şimali Afrika və ABŞ-ın cənub-qərbində bəzi yerlərdə havanın hərarətinin 45 dərəcə Selsini keçəcəyi gözlənilir.
Kanada 6,6 milyon hektar ərazinin yanması ilə rekord qıran ən pis meşə yanğınlarından birini yaşadığı bir vaxtda iyulun sonu və avqustun əvvəlində ABŞ-ın bir sıra əyalətləri və şimal ştatları da bundan təsirlənib. Bu yay iki dəfə Kanada yanğınlarının tüstüsü Atlantik okeanını keçərək avqustun 5-dən 7-dək Qərbi Avropanın, iyunun sonunda isə Mərkəzi və Cənubi Avropanın səmasına yayılıb.
Başqa ölkələr də - Kipr, Yunanıstan və Türkiyə əhalini təxliyə etməyə məcbur edən və ölümlərə səbəb olan meşə yanğınları ilə mübarizə aparır. ABŞ-da Arizona ştatının Böyük Kanyon Milli Parkında baş verən meşə yanğını bu məşhur ərazidə turizmi tamamilə dayandırıb.
ÜMT Baş katibinin müavini Ko Barret bildirib: “Həddindən artıq istiləri bəzən səssiz qatil adlandırırlar, lakin bugünkü elm, məlumat və texnologiya ilə hər bir ölümün qarşısı alına bilər”.
ÜMT istiliyin erkən xəbərdarlığı sistemlərini gücləndirmək üzərində işləyir. Qlobal və yerli tərəfdaşlarla əməkdaşlıq edən təşkilat, həmçinin ölkələrə istilik-sağlamlıq fəaliyyət planları hazırlamağa və risk altında olan əhalinin vaxtında xəbərdarlıq almasını təmin etməyə kömək edir. Əsas diqqət isə 2015-ci il Paris Sazişinə uyğun olaraq qlobal istiləşməni sənayedən əvvəlki səviyyədə - 1,5 dərəcə Selsidə məhdudlaşdırmaqdır.
Təşkilatın hesablamalarına görə, təkcə 57 ölkədə istiliklə bağlı xəbərdarlıq sistemlərinin genişləndirilməsi hər il təxminən 100 min insanın həyatını xilas edə bilər.
